މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާޒިމް ވިދާޅުވީ، މާލޭގެ މަގުތަކަށް ކުނި އެޅުން ވަރަށް ބޮޑަށް އާންމު ވެފައިވާ ކަމަށާއި، އެކަން ނުކުރުމަށް އިލްތިމާސް ކުރައްވާ ކަމަށެވެ.
އާޒިމް ވިދާޅުވީ މާލޭގެ މަގުތައް ސާފުތާހިރުކޮށް ބޭއްވުމަށްޓަކައި އާންމު ރައްޔިތުންގެ އެއްބާރުލުން ކައުންސިލައް ވަރަށް ބޮޑަށް ބޭނުންވާ ކަމަށެވެ. އެހެންކަމުން ފުޅިއާއި ޕެކެޓް ފަދަ ތަކެތި ބުއިމަށްފަހު މަގުމައްޗަށް ވައްޓާލުމުގެ އާދައާއި ދުރުހެލިވާން ޖެހޭ ކަމަށް އޭނާ ވިދާޅުވި އެވެ.
އާޒިމް އިތުރަށް ވިދާޅުވީ މަގުމައްޗަށް ކުނި އެޅުން ހުއްޓުވުމުގައި ސްކޫލް ތަކާއި ބެލެނިވެރިން ވެސް ޒިންމާ އަދާކުރައްވަން ޖެހޭ ކަމަށެވެ. އެގޮތުން ބެލެނިވެރިން ކުދިން ގޮވައިގެން ދަމުން ޕެކެޓް ފަދަ ތަކެތި މަގުމައްޗަށް ދޫކޮށްލުން ފަދަ ކަންކަން ނުކުރުމަށް އޭނާ އިލްތިމާސް ކުރެއްވި އެވެ.
ސިޓީ ކައުންސިލުން މަސައްކަތް ކުރާނީ މާލެއަކީ ސާފުތާހިރު ތަނަކަށް ހެދުމަށް ކަމަށާއި، އެކަން ހާސިލް ވާނީ އެންމެން އެކުގައި މަސައްކަތް ކޮށްގެން ކަމަށް އާޒިމް ވިދާޅުވި އެވެ.
