ވަގުތީ ޝެލްޓާ އެޅުމުގެ އެއްބަސްވުމުގައި ސޮއިކުރެއްވީ މާލޭގެ މޭޔަރު އާދަމް އާޒިމް އަދި އެނިމަލް ވެލްފެއާ މިނިސްޓްރީގެ ސްޓޭޓް މިނިސްޓަރު ހުސައިން އިސްމާއިލެވެ.
ބުޅާތަކަށް ހާއްސަ ޝެލްޓާތަކެއް އަޅަން ހުޅުމާލެއިން ވަނީ 5،000 އަކަފޫޓުގެ ބިމެއް ހަމަޖައްސައިފަ އެވެ. އެތަން ނިމޭއިރު، ބުޅާތަކަށް ހާއްސަ ހޮޓަލާއި ޕާކް އަދި ފިހާރަ ހުންނާނެ އެވެ.
އެއްބަސްވުމުގައި ސޮއި ކުރުމަށްފަހު މޭޔަރު އާޒިމް ވިދާޅުވީ، މި ކަމަށްޓަކާ ކައުންސިލުން ވަރަށް ފުރިހަމަ މަސައްކަތްތަކެއް ކޮށްފައި ވާކަމަށެވެ. އަދި، މިކަމަށް ބޭނުންވާ ބިން ވެސް ފަސޭހަކަމާ އެކު ހަމަޖެހުނު ކަމަށާއި އެކަމުން ދޭހަވަނީ ކައުންސިލްގެ މަސައްކަތްތަކަށް ސަރުކާރުން އެއްބާރުލުން ދޭކަން ކަމަށް މޭޔަރު ވިދާޅުވި އެވެ.
ސިޓީ ކައުންސިލުން ބުނީ ކެޓް ޝެލްޓާ އަޅަން ހަމަޖައްސާފައިވާ ބިން ވަރަށް އަވަހަށް ލިބޭނެ ކަމަށެވެ. އެ މަސައްކަތްތައް އަންނަ މަހުގެ ތެރޭގައި ނިންމައި ބޭނުންކުރަން ފަށާނެ ކަމަށް ވެސް ކައުންސިލުން ބުންޏެވެ.
ހުރިހާ ވަގުތަކު ވެސް ސިއްހީ ހިދުމަތް ލިބޭނެހެން ހުޅުމާލެ ދެވަނަ ފިޔަވައްސާ ގުޅިފައި އޮތް ފަރުކޮޅުފުށީގައި ޕެޓް ކެއާ ފެސިލިޓީއެއް ގާއިމު ކުރަން ނިންމާ މި މަހުގެ 11ވަނަ ދުވަހު ވެސް ވަނީ އެއްބަސްވުމެއްގައި ސޮއިކޮށް ބިން ހަވާލުކޮށްފަ އެވެ.