ޕްރޮސިކިއުޓަރ ޖެނެރަލްގެ އޮފީހުގެ ހިދުމަތްތައް ލަގްޒަރީ ޕަބްލިކް ސަރވިސްއަކަށް ބަދަލުކުރުމުގެ މަސައްކަތް ފަށްޓަވަން ކުރައްވަމުން ގެންދަވާ މަސައްކަތް ހާމަ ކުރައްވަމުން، ޝަމީމް، އެ މަނިކުފާނުގެ ބްލޮގްގައި ވިދާޅުވީ، މަޑުމަޑުން މަސައްކަތް ކުރަމުން ގޮސް، ދާދި އަވަހަށް، ރިސޯޓަކުން ޓުއަރިސްޓަކަށް ލިބޭ ފެންވަރުގެ ހިދުމަތެއް، ޕީޖީ އޮފީހުން ފޯރުކޮށްދެއްވުމަކީ ޝަމީމްގެ ތަސައްވުރު ކަމަށެވެ.
ޝަމީމް ވިދާޅުވީ ޕީޖީ އޮފީސް، ލަގްޒަރީ ޕަބްލިކް ސަރވިސްއަކަށް ހެދުމުގެ ރާސްތާގައި އެންމެ ފުރަތަމަ ބަދަލުކުރީ ފޯނަށް ޖަވާބުދޭގޮތް ކަމަށެވެ. އެއަށްފަހު، ކުށުގެ ރެކޯޑު ސާފުކޮށްދިނުން އޮޓޯމޭޓްކޮށް، ވަގުތުން ލިބޭގޮތް ހަދައިފީ ކަމަށް ޝަމީމް ވިދާޅުވި އެވެ.
މައްސަލައެއްގައި އަނިޔާ ލިބޭ މީހަކަށް، އެމީހެއްގެ މައްސަލައެއް ހިނގާގޮތް ކޮންމެ ވަގުތަކުވެސް ބެލޭނެ ކަމަށާއި ސިޓީބިޓީއަށް ޖަވާބުދޭނީ، ލިޔެފައި އޮތް ފަލްސަފާއެއްގެ ތަރަހައިގެ ތެރެއިން، ސާފު ދިވެހި ބަހުން ކަމަށް ޝަމީމް ވިދާޅުވި އެވެ.
ޝަމީމް އިތުރަށް ވިދާޅުވީ ޝަކުވާ ހުށަހެޅުމުގެ ނިޒާމާއެކު، ޕީޖީ އޮފީހުން އާންމުންނަށް ފޯރުކޮށްދޭ ހުރިހާ ހިދުމަތެއް މިހާރު އޮންލައިންކޮށް ދެވޭނެ ކަން ޝަމީމް ފާހަގަ ކުރެއްވި އެވެ. އަދި އެއްވެސް ކަމަކު ޕީޖީ އޮފީހަށް އާންމުންގެ މީހަކު އަންނާކަށް ނުޖެހޭނެ ކަމަށާއި ކޯޓަށް ފޮނުވާ މައްސަލަ އޮންލައިންކޮށް ފޮނުވޭނެ ޓެކްނޮލޮޖީ އެބަހުރި ކަމަށް ޝަމީމް ވިދާޅުވި އެވެ.