އެ ޕާޓީން އެހެން ބުނެފައިވަނީ އިއްޔެ ވަޒީރުން ރުހުން ދިނުމަށް ބޭއްވީ މަޖީލީސް ޖަލްސާގައި އެ ޕާޓީން ނެރެފައިވާ ވިޕްލައިން އާއި ހިލާފަ ބަޔެއް މެމްބަރުން ވޯޓުލާފައިވާކަމަށް އަޑު ފެތުރިފައިވާ ދަނޑިވަޅެއްގައިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އެޕާޓީގެ ޕީޖީ ލީޑަރު، އަދި އަލިފުށި ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ، ޕީޖީ ގްރޫޕުގެ ހިންގާ ގަވައިދުގައި ވިޕާއި ހިލާފުވާ ފަރާތްތަކާއި މެދު އަމަލު ކުރާނެ ގޮތްތަކެއް އޮންނަ ކަމަށެވެ.
ވިޕްލައިނާއި ހިލާފުވެފައިވާ އެމްޑީޕީގެ މެމްބަރުގެ ތެރޭގައި ހިމެނެނީ އިހަވަންދޫ ދާއިރާގެ މެމްބަރު މުހައްމަދު ޝިފާއު އާއި ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒް، ކުޅުދުއްފުށި ދެކުނު ދާއިރާގެ މެމްބަރު ޖަމްޝީދު މުހައްމަދު، ބިލެއްދޫ ދާއިރާގެ މެމްބަރު އަހުމަދު ހަލީމް، ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުލްލަތީފު، ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް ގެ އިތުރުން މަކުނުދޫ ދާއިރާގެ މެމްބަރު، މުހައްމަދު ރާއީ އެވެ.
އާ ސަރުކާރުގެ ކެބިނެޓްގެ 22 ވަޒީރުންގެ ތެރެއިން މަޖިލީހުން ރުހުން ނެތް ކަމަށް އިއްޔެ ނިންމީ، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު، ހައުސިން މިނިސްޓަރު ޑރ. އަލީ ހައިދަރު އަދި ބަންޑާރަ ނާއިބު އަހްމަދު އުޝާމް ގެއެވެ.
ކެބިނެޓްގެ މި ތިން މެންބަރުންނަށް މަޖިލީހުން ރުހުން ނުދޭން ނިންމުމާއެކު، އަލުން އެ ތިން ބޭފުޅުން ހަމަ އެ މަގާމްތަކަށް ސަރުކާރުންވަނީ އައްޔަންކޮށްފަ އެވެ. މި ތިން ބޭފުޅުންނަށް އެ ބޭފުޅުން ކުރިންވެސް ތިއްބެވި މަގާމަށް އައްޔަންކުރައްވައި މަގާމުގެ ފަތްކޮޅު، ރައީސް ޑރ. މުހައްމަދު މުއިއްޒު މިހާރު އަރުއްވާފައި އެވެ
އިއްޔެ މަޖިލީހުގެ ނިންމުމާއި ދެކޮޅަށް ސަރުކާރުން އަމަލުކުރި ގޮތުން އިދިކޮޅު އެމްޑީޕީ އަދި ދަ ޑިމޮރެޓުން ވަނީ ކަންބޮޑުވުން ފާޅުކޮށްފަ އެވެ.
