މިއަދު އެކްސްގައި ކުރެއްވި ޕޯސްޓެއްގައި ކުރީގެ ރައީސް ނަޝީދު ވިދާޅުވީ ނުފޯރާ ފޮތިން ފޫގަޅަން އުޅެންޏާ ފެންނަނީ "އޮރިޔާން"ކަމަށެވެ.
އެ މަނިކުފާނު އިތުރަށް ވިދާޅުވީ އިންޑިޔާގެ ކަނޑުގެ ސަރަހައްދަށް ޗައިނާ "ސްޕައި" ބޯޓުފަހަރުތައް ގެނެސް، އިންޑިޔާގެ ޕްރައިމިނިސްޓަރާއި ދިމާލަށް ހިތުހުރި އެއްޗެއް ގޮވީމާ މާގިނަ ގޮތް ވާނޭ ކަމުގަ އެވެ.
ރައީސް ނަޝީދު މިހެން ވިދާޅުވެފައިވަނީ ރާއްޖޭގެ ސަރަހައްދުގައި އޮތް ދިވެހި މަސްދޯންޏަކަށް ބޭރުގެ ސިފައިންތަކެއް އެރި ކަމަށް ބުނާ ރިޕޯޓެއް ލިބިގެން، އެ މައްސަލަ ބަލަމުން އަންނަ ކަމަށް އެމްއެންޑީއެފުން ބުނެފައިވާ ވަގުތެއްގައި އެވެ.
އެމްއެންޑީއެފް އިން ބުނީ ބޭރުގެ ސިފައިންގެ ބަޔަކު ދިވެހި މަސް ދޯންޏަކަށް އެރި ކަމަށް ރިޕޯޓުކޮށްފައި ވަނީ ދިވެހި އީއީޒެޑްގެ ތެރެއިން ކަމަށް މައުލޫމާތު ލިބޭ ކަމަށެވެ. އެނގިފައިވާ ގޮތުގައި އިންޑިއާ ސިފައިންގެ ބަޔަކު އެރީ އދ. މަހިބަދޫއަށް ނިސްބަތްވާ "އަސުރުމާ 3" ދޯންޏަށެވެ.
އެމްއެމްޑީއެފުން އެ މައުލޫމާތު ހިއްސާކުރުމުގެ ކުރިން، ބޮޑު ކަންނެލި މަސްވެރިންގެ ޔޫނިއަންއިން އެކްސްގައި ކުރި ޕޯސްޓެއްގައި ވަނީ ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުންދިޔަ ދޯންޏެއް ކައިރިއަށް އިންޑިއާގެ މަނަވަރެއް މަޑުކޮށްފައިވާ ކަމަށް ބުނެފަ އެވެ.
- އިތުރަށް ކިޔާލަން: ބޭރުގެ ސިފައިންތަކެއް މަސްދޯންޏަކަށް އެރި ކަމަށް ބުނާ މައްސަލައެއް ބަލަނީ
