މިއަދު ހެލްތް މިނިސްޓްރީގައި ބޭއްވި ހާއްސަ ރަސްމީޔާތެެއްގައި މި ކެމްޕޭނު ފައްޓަވާ ދެއްވީ ހެލްތް މިނިސްޓަރު ޑރ. އަބްދުﷲ ހަލީލް އެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ މި ކެމްޕޭނަކީ ވަރަށް ބިޔަ ބޮޑު ކެޕޭނެއް ކަމަށާއި މި ކެމްޕޭނު އެންމެ ރަނގަޅަށް ހިނގިއްޖެނަމަ މި ކެމްޕޭނު ވެގެންދާނީ ގައުމަށް މަންފާ ކުރުވަނިވި އަދި މުސްތަގުބަލަށް އިންތިހާ އަށް ފައިދާ ކުރާނެ ކެމްޕޭނެއް ކަމުގައި އެވެ.
މިނިސްޓަރު ހަލީލް އިތުރަށް ވިދާޅުވީ މި ސަރުކާރުން އަޅަން ނިންމާފައިވާ ތެލެސީމިއާ ހޮސްޕިޓަލް ވެގެން ދާނީ ތެލެސީމިއާ ޕޭޝަޓުންނައް ވަރަށް މުހިންމު ހޮސްޕިޓަލަކަށްކަމަށެވެ.
މިހާރުއެ ހޮސްޕިޓަލް އަޅަން ބިން ހަމަޖެހިފައިވާކަމަށާއި މިހާރުވެސް އެ ހޮސްޕިޓަލް އެޅުމަށް ވާންޖެހޭ ތައްޔާރީތައް ވަމުން އަންނަ ކަމަށް މިނިސްޓަރު ފާހަގަކުރެއްވިއެވެ.
މިފެށޭގެންދާ ކެމްޕޭނުގެ ސަބަބުން ރާއްޖޭގެ ހުރިހާ ފަރާތެއްވެސް ތެލެސީމީއާ ޓެސްޓު ކުރެވިގެންދާނޭކަމަށާއި މިކަން ކުރަން ކޮންމެހެން ލާޒިމްވެގެން ދާނޭކަމަށް މިނިސްޓަރު ހަލީލް ވިދާޅުވި އެވެ.
ރާއްޖޭގެ އާބާދީގެ %17 އަކީ ތެލެސީމިއާ ބަލީ ޕޭޝަންޓުން ނުވަތަ އެ ބަލީގެ އަލާމާތް ފެނިފައިވާ ބޭފުޅުން ކަމަށް މިނިސްޓަރު ވިދާޅުވި އެވެ. މިއީ އާބާދީގެ ވަރަށް ބޮޑު އަދަދެއް ކަމަށާއި އެންމެން ވެގެން އެކަމާ ނުވިސްނާއިފީޔާ އެ އަދަދު ދުވަހުން ދުވަހަކަށް ދާނީ މަތިވަމުން ކަމަށް މިނިސްޓަރު ވިދާޅުވި އެވެ.
އެހެންކަމުން ބޭރުގެ ބަޔެއް ގައުމުތަކުގައި މިބަލި ކޮންޓްރޯލް ކޮށްފައި އޮތް ގޮތް ބަލާ ދިރާސާ ކުރަން އެބަ ޖެހޭކަމަށާއި މިހާރުވެސް އެ ގައުމުތަކާއި އެކަމާއި ގުޅޭ ގޮތުން މަޝްވަރާ ކުރެވިފައިވާކަމަށް ހަލީލް ވިދާޅުވި އެވެ.
މި ހަފްލާގައި ވާހަކަ ދައްކަވަމުން ހެލްތް މިނިސްޓްރީގެ ސްޓޭޓް މިނިސްޓަރު އައިމިނަތު ޝިރުނާ ވިދާޅުވީ މި ކެމްޕޭނުގެ މަގުސަތަކީ ތެލެސީމިއާ އާއި ބެހޭ ގޮތުން ގައުމީ ފެންވަރެއްގައި އާންމުން ހޭލުންތެރި ކުރުވުންކަމަށާއި ތެލެސީމީއާ އާއި ބެހޭ މައުލޫމާތު އާންމުންނައް ފޯރުކޮށްދިނުން ކަމުގަ އެވެ.
މިކަމުން އަރައިގަތުމަށް ފަރުދީ ފެންވަރެއްގައި ކުރެވިދާނޭ ކަންކަމާއި ބެހޭ ގޮތުން އާންމުން ހޭލެންތެރިކުރުވުމަކީ ވަރަށް މުހިންމުކަމެއް ކަމަށް ޝިރުނާ ފާހަގަކުރެއްވި އެވެ.
މި ކެމްޕޭން ފެށުމުގެ ކުރިން ކޯޑިނޭޝަން ކޮމިޓީއެއް އުފެދުންކަމަށާއި މި ކޮމިޓީގެ ލަފާގެ މަތިން ބައެއް މުހިންމުކަންތައް ކުރަން ނިންމާފައިވާކަމަށް ޝިރުނާ ވިދާޅުވި އެވެ.
މީގެ އިތުރުން ކުރިއަށް އޮތް 4 މަސްދުވަހުގެ ތެރޭގައި ގްރޭޓަރ މާލޭ ސަރަހައްދުގެ ގްރޭޑް 10 ގެ ދަރިވަރުންނަށް ހޭލުންތެރިކުރުމުގެ މައުލޫމާތު ސެޝަންތައް ކުރިއަށް ގެންދެވޭނެއެވެ.
ތެލަސީމިއާ ބަލީގައި 650 ކުދިން މިހާރުވެސް ރާއްޖޭގެ އެކި ސަރަހައްދުތަކުން ފަރުވާ ހޯދަމުންދާ ކަމަށް ތަފާސްހިސާބުތަކުން ދައްކަ އެވެ.
