ސަރުކާރުގެ ފަރާތުން އޭސީސީގެ ގާނޫނަށް އިސްލާހު ގެނައުމަށް ހުށައެޅުއްވީ ފެލިދޫ ދާއިރާގެ މެންބަރު އާދަމް ޒާހިރުއެވެ. އިލެކްޝަންސް ކޮމިޝަންގެ ގާނޫނަށް އިސްލާހު ހުށައެޅުއްވީ ކެލާ ދާއިރާގެ މެންބަރު އަބްދު ﷲ ޝަރީފެވެ.
މި ދެ ބިލް މަޖލީހުން ފާސްކުރީ 69 މެމްބަރުންގެ ތާއީދާއެކުއެވެ. ދެކޮޅަށް ވޯޓު ދެއްވީ، އިދިކޮޅު އެމްޑީޕީއަށް ނިސްބަތްވެވަޑައިގަންނަވާ 10 މެންބަރުންނެވެ.
އިލެކްޝަން ކޮމިޝަނާއި އެންޓީ ކޮރަޕްޝަން ކޮމިޝަންގެ ގާނޫނު މިހާރު ބުނާ ގޮތުން އެ ކޮމިޝަންތަކުގެ ރައީސާއި ނައިބު ރައީސް އައްޔަންކުރާނީ ކޮމިޝަންގެ ޖަލްސާގައި މެމްބަރުގެ ތެރޭގައި ނަގާ ވޯޓަކުން ހޮވޭ މެމްބަރެކެވެ.
މަޖިލީހުން މިއަދި ފާސްކުރި ދެ ބިލްގައިވާ ގޮތުންވެސް އެ ކޮމިޝަންތަކުގެ ރައީސް އާއި ނައިބު ރައީސް އައްޔަންކުރަން ބޭނުންވާ ކޮންމެ ފަހަރަކު ކޮމިޝަން މެމްބަރުންގެ ތެރެއިން މެމްބަރެއްގެ ނަން ރައީސް މަޖިލިހަށް ފޮނުވަންޖެހެއެވެ. އަދި އެ މަގާމަށް އައްޔަންކުރާނީ ރައީސް ފޮނުވާ ނަން މަޖިލީހުން ފާސްކުރުމުންކަމަށް އެ އިސްލާހުގައިވެއެވެ.
ސަރުކާރުގެ މި ބަދަލާއި އެކި ކޮމިޝަންތަކަށް ސަރުކާރުގެ ނުފީޒު ވަންނާނެކަމަށް ބުނެ އިދިކޮޅުން ވަނީ ކަންބޮޑުވުން ފާޅުކޮށްފައެވެ.
