މިދިޔަ އަހަރުގެ ނޮވެމްބަރު 17 ގައި މަގާމުގެ ހުވާކުރެއްވި ރައީސް މުއިއްޒު މިހެން ވިދާޅުވީ، އެ މަނިކުފާނުގެ ފުރަތަމަ ރިޔާސީ ބަޔާން ރައްޔިތުންގެ މަޖިލިހުގެ މި އަހަރުގެ ފުރަތަމަ ދައުރުގެ ފުރަތަމަ ޖަލްސާ އަށް އިއްވަވަމުންނެވެ
ރައީސް ވިދާޅުވީ ދަތުރުފަތުރުގެ ހިދުމަތް ފުޅާ ކުރުމަކީ ރާއްޖޭގެ އިގްތިސޯދު ވަރުގަދަ ކުރުމަށްޓަކައި އިސްކަން ދޭން ޖެހޭ ކަމެއް ކަމަށެވެ. އެގޮތުން އާ ދެ އެއާޕޯޓްގެ މަސައްކަތް މިއަހަރު ތެރޭގައި ފަށާނެ ކަމަށް ރައީސް ވިދާޅުވި އެވެ.
ރައީސް އިތުރަށް ވިދާޅުވީ ރާއްޖޭގެ ގައުމީ އެއާލައިން މޯލްޑިވިއަންގެ ހިދުމަތް ފުޅާކޮށް، ދުނިޔޭގެ ގިނަ މަންޒިލް ތަކަށް އުދުހެވޭނެ ފަދަ ބިޔަ މަތިންދާބޯޓުތައް ވެސް މިއަހަރު ރާއްޖެ ގެންނާނެ ކަމަށެވެ.
މީގެއިތުރުން ރާއްޖޭގައި އެންމެ ޒަމާނީ އަދި ރައްކާތެރި ހެލިކޮޕްޓަރުގެ ހިދުމަތް ފެށުމަށް ނިންމައި އެކަމުގެ މަސައްކަތް މިހާރު ފަށާފައިވާ ކަމަށް ވެސް ރައީސް ފާހަގަ ކުރެއްވި އެވެ.
މިއަހަރު ތެރޭގައި އާ ދެ ޑޮމެސްޓިކް އެއާޕޯޓުގެ މަސައްކަތް ފަށާނެ ކަމަށް ރައީސް މިއަދު ވިދާޅުވިއިރު، ރާއްޖޭގައި އިތުރު 15 ޑޮމެސްޓިކް އެއާޕޯޓް އެޅުމަށް ސަރުކާރުން ވަނީ ނިންމާފަ އެވެ.
