ކަފާލާތުގެ ބިލް މި ދައުރުގައި ހުށަހަޅާނެ ކަމަށް ރައީސް ވިދާޅުވީ އެ މަނިކުފާނުގެ ފުރަތަމަ ރިޔާސީ ބަޔާނުގައެވެ.
އަދުލު އިންސާފުގެ ނިޒާމު ހަރުދަނާކުރުމަށް ކަފާލާތުގެ ދަށުން ބަންދުން ދޫކޮށްލުމުގެ ޤާނޫނަކާއި، ނުހައްގުން ޖަލުގައި ބަންދުކުރާ މީހުންނަށް ލިބޭ ގެއްލުމުގެ ބަދަލު ދެވޭނެ ގާނޫނެއް އެކުލަވާލާލުން އެއީ ޑރ. މުއިއްޒުގެ ރިޔާސީ ވައުދެެއްވެސްމެއެވެ.
ކަފާލާތުގެ ފުރިހަމަ ޤާނޫނެއް ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި އެކުލަވާލާނެކަން ޑރ މުއިއްޒ އެންމެ ފުރަތަމަ ހާމަކުރެއްވީ ރިޔާސީ ކެމްޕެއިންގެ ތެރޭގައެވެ. ކަފާލާތަކީ ދުނިޔޭގެ ތަހުޒީބު ގައުމުތަކުގައި ވެސް އަމަލުކުރާ އުސޫލެއް ކަމަށާއި، ކުށުގެ ތުހުމަތުކުރެވޭ މަރުހަލާގަޔާއި، އިސްތިއުނާފު މަރުހަލާގައި ކަފާލާތު ލިބުމަކީ ހައްގެއްކަމަށާއި، އެއީ ދުނިޔޭގެ ޑިމޮކްރެޓިކް ގައުމުތަކުގައި ވެސް އަމަލުކުރާ އުސޫލުކަން ޑރ މުއިއްޒު އޭރު ފާހަގަކުރެއްވި އެވެ.
