ގަތަރުގައި މިހާރު ކުރިއަށްދާ އޭއެފްސީ އޭޝިއަން ކަޕުގެ ފައިނަލުގެ ފުރަތަމަ ޖާގަ ޖޯޑަންއިން ހޯދީ، ސެމީ ފައިނަލް ފުރަތަމަ މެޗުގައި ދެކުނު ކޮރެއާ ބަލިކޮށްގެނެވެ.
ގަތަރުގެ އަހްމަދު ބިން އަލީ ސްޓޭޑިއަމުގައި ކުޅުނު ސެމީ ފައިނަލް މެޗު ޖޯޑަންއިން ކާމިޔާބުކުރީ 2-0 ގެ ނަތީޖާއަކުންނެވެ. މިއީ އޭޝިއަން ކަޕުގެ ފައިނަލުން އެ ޓީމު ޖާގައެއް ހޯދި ފުރަތަމަ ފަހަރެވެ.
މެޗުގައި ލަނޑެއް ނުޖެހި ނިމުނު ފުރަތަމަ ހާފަށް ފަހު، ޖޯޑަންއިން ފުރަތަމަ ލަނޑު ޖެހީ، ދެވަނަ ހާފު ފަށައިގެން އަށްވަނަ މިނެޓުގައެވެ. މޫސާ އަލް-ތަމާރީ ދިން ބޯޅައަކުން މި ލަނޑު ކާމިޔާބުކޮށްދިނީ ޔަޒާން އަލް-ނައިމަތެވެ. އަދި މެޗުގެ 66 ވަނަ މިނެޓުގައި ނިޒާރް މަހްމޫދު އަލް-ރަޝްދާންގެ އެހީއާއެކު އަލް-ތަމާރީ ވަނީ ލަނޑެއް ޖަހައި، ޖޯޑަންގެ ލީޑު ފުޅާކޮށްދީފައެވެ.
މުބާރާތުގެ ފައިނަލުގައި ޖޯޑަން ވާދަކުރަން ޖެހޭނީ ސެމީ ފައިނަލް ދެވަނަ މެޗުގައި ގަތަރާއި އިރާން ކުޅެގެން މޮޅުވާ ޓީމަކާއެވެ.
