ރައީސް ޔާމީން ވެރިކަމުގައި ފޮރިން މިނިސްޓަރުކަންވެސް ކުރެއްވި ދުންޔާ ވާދަކުރައްވަނީ ހުޅުމާލެ ދެކުނު ދާއިރާއަށެވެ.
މަޖިލިސް އިންތިހާބަށް ޕީޕީއެމް/ ޕީއެންސީގެ ޓިކެޓް ދިނުމަށް ބޭއްވި ޕްރައިމެރީގައިވެސް ދުންޔާ ވަނީ އެ ދައިރާއަށް ވާދަކުރައްވާފައެވެ. އެހެންނަމަވެސް 70 ވޯޓާއި އެކު ދުންޔާއަށް ވަނީ ބޮޑު ނާކާމިޔާބީއަކާއި ކުރިމަތިވެޑައިގެންފައެވެ.
މަޖިލީހުގައި ވާދަކުރައްވަން ފޯމު ހުށައެޅުއްވުމަށްފަހު ދުންޔާ ވިދާޅުވީ ރައްޔިތުންނަށް ހިދުމަތް ކުރެއްވުން މަތީގައި ސާބިތުވެ ހުންނަވާނެކަމަށެވެ. ދުންޔާގެ ފޯމް ހުށައެޅުއްވިއިރު ބޭބޭ ފުޅު ފާރިސް މައުމޫންވެސް އަރިހުގައި ހުންނެވިއެވެ. އަދި ޕީއެންސީގެ ހަރަކާތްތަކުގައި އިސްކޮށް ފެންނަ ބައެއް މޫނުތައްވެސް ތިއްބެވެ.
ރައީސް މައުމޫންގެ ބޭފުޅުންގެ ތެރެއިން ފާރިސް މައުމޫންވެސް ވަނީ ރައްޔިތުން މަޖިލީހުގެ މައްޗަންގޮޅި އުތުރު ދާއިރާގެ ގޮނޑިއަށް މިނިވަން ކެންޑިޑޭޓެއްގެ ގޮތުގައި ވާދަކުރައްވާނެކަން އިއުލާންކުރައްވާފައެވެ.
މީ އެ ދާއިރާގެ ގޮނޑިއަށް ފާރިސް ވާދަކުރައްވާ ދެވަނަ ފަހަރެވެ. އެންމެ ފަހުން ބޭއްވި 19 ވަނަ ރައްޔިތުން މަޖިލީހުގައިވެސް މައްޗަންގޮޅި އުތުރު ދާއިރާއަށް ވާދަކުރައްވާ ފާރިސް 607 ވޯޓާއި އެކު ވަޑައިގަތީ ތިންވަނަ އަށެވެ.
