މަޓާޓޯއިން މިއަދު ނެރުން ނޫސް ބަޔާނެއްގައި ބުނެފައިވަނީ މިހާރު މިގައުމަށް ކުރިމަތިވެފައިވާ ޑޮލަރު ލިބުމުގެ ދަތިކަން ދިމާވާ ޖެހުން އެއްސަބަބަކީ ބޭންކުތަކުން އާންމު ވިޔަފާރިތަކަށް ލޯނު ދިނުމަގެ ބަދަލުގައި ބޮންޑުތަކަށް ފައިސާ ދެއްކުން ކަމުގަ އެވެ.
އެ ބަޔާނުގައި ވާ ގޮތުން ސަރުކާރުން ބޮންޑުތައް ދެއްކުމުގެ ބަދަލުގައި ވިޔަފާރިތަކަށް ލޯނުދޭ ނަމަ އެ ލާރި ގައުމުގެ ތެރޭގައި ރޯލްވާނޭކަމަށާއި މިކަމުގެ ސަބަބުން ޑޮލަރުގެ މައްސަލައަށް ހައްލެއް ލިބި ޑޮލަރުގެ ވަގު ވިޔަފާރިވެސް ހުއްޓުމަކަށް ދާނޭކަމުގަ އެވެ.
ލޯކަލް ވިޔަފާރިތަކަށާއި ވަކިވަކި ފަރުދުންނަށް ޑޮލަރު ލިބުން މަދުވުމުން، ރާއްޖޭގެ ހާލަތު ވަނީ ސީރިއަސް ދަރަޖަތަކަށް ގޮސް، ގައުމުގެ އިގްތިސާދުގެ ހަމަޖެހުމަށް ބޮޑު ނުރައްކަލެއް ވެއްޓިފައި ކަމަށް މަޓާޓޯއިން ބުނެއެވެ.
ދުނިޔޭގެ ކުރިއަރާފައިވާ ދެ އިގްތިސާދު ކަމަށްވާ ޖަޕާނާއި އިނގިރޭސިވިލާތް ދާދި ފަހުން ރިސެޝަނަށް ގޮސްފައިވާކަމަށް އެ ބަޔާނުގައި ބުނެފައިވެއެވެ.
ބޮންޑުތަކަށް ފައިސާ މިގޮތަށް ދައްކަމުން ދާ ނަމަ އިގްތިސާދީ ކުރިއެރުމަށް ވަރަށް ބޮޑަށް ހުރަސްއެޅި، ޑޮލަރުގެ ދަތިކަން އިތުރަށް ގޯސްވެގެންދާނެ ކަމުގައި މަޓާޓޯއިން ފާހަގަކުރެއެވެ
