ރައީސް ޑރ. މުއިއްޒު އައްޑޫ ސިޓީއަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން މަރަދޫ އާއި މަރަދޫފޭދޫ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން އެ މަނިކުފާނު ވިދާޅުވީ، އެންމެ ކުރު މުއްދަތެއްގެ ތެރޭގައި މަސްވެރިންނަށް އެންމެ ގިނަ ފައިސާ ދީފައިވާނީ މި ސަރުކާރުން ކަމަށެވެ.
ރައީސް ވިދާޅުވީ މި ސަރުކާރުން ވެރިކަމާ ހަވާލުވިއިރު، މަސްވެރިންނަށް ދޭންޖެހޭ 200 މިލިއަނަށް ވުރެ ގިނަ ރުފިޔާ ހުރި ކަމަށެވެ.
ރައީސް ވިދާޅުވީ މަސްވެރިކަން އިތުރަށް ކުރިއަށްދާ ވަރަކަށް ދޭންޖެހޭ ފައިސާ ވެސް އިތުރުވަމުންދާނެ ކަމަށެވެ. އެގޮތުން، މިހާރުވެސް މަސްވެރިންނަށް ދައްކަންޖެހޭ 300 މިލިއަނެއްހާ ރުފިޔާ އެބަހުރި ކަމަށް ރައީސް ފާހަގަ ކުރެއްވި އެވެ.
މީގެއިތުރުން މަސްވެރިންނަށް ދައްކަންޖެހޭ ފައިސާ ދެމެހެއްޓެނިވި ގޮތެއްގައި އަދި ކުރު މުއްދަތެއްގެ ތެރޭގައި ދެއްކޭނެ ނިޒާމެއް ގާއިމްކުރުމުގެ މަސައްކަތް ކުރައްވަމުން ގެންދާ ކަމަށް ރައީސް ވިދާޅުވި އެވެ.
ރައީސް މިފަދައިން ވިދާޅުވެފައިވަނީ ފައިސާ ލިބުން ލަސްވަމުންދިއުމާ ގުޅިގެން މަސްވެރިން މިއަދު ކޫއްޑޫގައި އިހްތިޖާޖު ކޮށްފައިވަނިކޮށެވެ.
އެ މައްސަލައާ ގުޅިގެން ފިޝަރީޒް މިނިސްޓަރު އަހްމަދު ޝިޔާމް ވަނީ ކޫއްޑޫއަށް ވަޑައިގެން މަސްވެރިންނާ ބައްދަލުކުރައްވާފަ އެވެ. އަދި މަސްވެރިންނަށް ނުދެވި ހުރި ފައިސާ އަންނަ މަހުގެ ފަސް ވަނަ ދުވަހުގެ ކުރިން ނިންމަވާނެ ކަމަށް މިނިސްޓަރު ވަނީ ވިދާޅުވެފަ އެވެ.