މިހާރު ރައީސް ޑރ. މުހައްމަދު މުއިއްޒު އައްޑޫ ސިޓީއަށް ކުރައްވަމުން ގެންދަވާ ދަތުރުގެ ތެރެއިން، ފޭދޫގައި ބޭއްވި ޖަލްސާގައި ވާހަކަދައްކަވަމުން އިޙްސާން ވިދާޅުވީ ރާއްޖެއިން މަސްތުވާތަކެތީގެ ވަބާ ފިލުވާލުވުމަށް ރައީސް ޑރ. މުއިއްޒުގެ ޚާއްސަ އިރުޝާދުގެ ދަށުން މަސައްކަތް ކުރައްވަމުންދާ ކަމަށެވެ.

 އެ މަސައްކަތުގެ ތެރެއިން މަސްތުވާތަކެތީގެ ވަބާގައި ޖެހިފައިވާ ކުދިން އަލުން އަނބުރާ މުޖުތަމަޢަށް ނެރުމުގެ މަސައްކަތްވެސް ބާރަށް ކުރިއަށްގެންދަވާކަމަށްވެސް އިހުސާން  ވިދާޅުވިއެވެ.

ސަރުކާރާއި ހަވާލުވިއިރު މަސްތުވާތަކެތީގެ ވަބާގައި ޖެހުމުން ފަރުވާއަށް ހުކުމްކޮށް ފަރުވާ ނުދެވި ތިބި ގާތްގަނޑަކަށް 700 އެއްހާ މީހުން ތިބިކަމަށާއި، އޭގެތެރެއިން 300 އެއްހާ މީހުންނަށް ފަރުވާ ދޭން މިހާރު ފަށާފައިވާކަމަށް މިނިސްޓަރު ވިދާޅުވިއެވެ. 

މީގެއިތުރުން މަސްތުވާތަކެތި އެތެރެކުރުން ހުއްޓުވުމަށް ކުރާ މަސައްކަތުގެ ދަށުން 44 މިލިޔަން ރުފިޔާގެ މަސްތުވާތަކެތި ރާއްޖޭގެ މަގުތަކަށް ނެރެމުގެ ކުރިން ހުއްޓުވާފައިވާކަންވެސް މިނިސްޓަރު ވިދާޅުވިއެވެ.