ޖަޕާނު ސަރުކާރުގެ އެހީގައި ހިންގާ މި މަޝްރޫއަށް އެ ގައުމުން ދިން 3.5 މިލިއަން ޑޮލަރުގެ އެހީގެ އެއްބަސްވުމުގައި ރާއްޖެއިން ސޮއިކުރެއްވީ ފޮރިން މިނިސްޓަރު މޫސާ ޒަމީރެވެ. އަދި ޖަޕާނު ސަރުކާރުގެ ފަރާތުން ސޮއިކުރެއްވީ ޖަޕާނުން ރާއްޖެއަށް ކަނޑައަޅުއްވާފައިވާ ހުންނަވާ ސަފީރު ޓަކެއުޗީ މިޑޯރީއެވެ.
މި މަޝްރޫއުގެ މަގްސަދަކީ ކުއްލި ހާލަތްތަކުގައި އެކަމާ ގުޅޭ މައުލޫމާތު ޓީވީއާއި ޑިޖިޓަލް ވަސީލަތްތަކަށް ފޮނުވުމާއި، މުހިންމު އާއްމު މައުލޫމާތު ރައްޔިތުންނާ ހަމައަށް ހަލުވިކޮށް ފޮނުވޭނެ ނިޒާމެއް މުޅި ރާއްޖޭގައި ގާއިމުކުރުމެވެ.
ޖަޕާނުގެ އެހީގެ އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން މިނިސްޓަރު ޒަމީރު ވަނީ ޖަޕާނުން ރާއްޖޭގެ ކުރިއެރުމަށް ބޮޑެތި އެހީތައް ވެދެއްވަމުން ގެންދަވާކަން ފާހަގަ ކުރައްވާފަ އެވެ.
ޑިޖިޓަލް ވަސީލަތްތައް މެދުވެރިކޮށް، އާއްމުންނާއި ހަމައަށް އަވަހަށް މައުލޫމާތު ފޯރުކޮށްދިނުމަށް ގާއިމުކުރާ މި ނިޒާމުގެ އަމަލީ މަސައްކަތް ފަށާފައިވަނީ 2022 ވަނަ އަހަރު އެވެ.
