މަސްވެރިކަމުގެ ކުދި އަދި މެދުފަންތީގެ ވިޔަފާރިތައް ކުރިއަރުވައި، ބާރުވެރި ކުރުމަށްޓަކައި ތައާރަފްކުރި މި ޕޯޓަލް އިފްތިތާހުކޮށްދެއްވީ އެސްޑީއެފްސީގެ މެނޭޖިން ޑިރެކްޓަރު އައިޝަތު ފިފްޝީން އަލީ އެވެ.
ބީސީސީން ބުނީ މަހަ ޕޯޓަލްއަކީ، އަންހެނުންނާއި ޒުވާން ވިޔަފާރިވެރިންނަށް މަސްވެރިކަމުގެ އުފެއްދުންތައް ވިއްކޭނެ މަގު ފަހިކޮށްދިނުމަށް، ހަފްތާ 14 ގެ މަގުޗާޓުގެ ދަށުން، ތައާރަފް ކުރި ޕޯޓަލްއެއް ކަމަށެވެ.
މި ޕޯޓަލް އިފްތިތާހުކުރުމަށް ބޭއްވި ހަފްލާގައި ވާހަކަ ދައްކަވަމުން އިކޮނޮމިކް މިނިސްޓްރީގެ ސްޓޭޓް މިނިސްޓަރު ހުސައިން ޒާމިރު ވިދާޅުވީ، މިއީ މަހާއި މަހުގެ އުފެއްދުންތަކާއި މަސްވެރިކަމާ ގުޅުންހުރި ތަކެތި އުފައްދާ ފަރާތްތަކަށް ކޮންމެ ތަނެއްގައި ހުރެވެސް އެތަކެތި ވިއްކައި އާމްދަނީ ހޯދޭނެ މަގު ފަހި ވެގެންދާނެ ޕޯޓަލްއެއް ކަމަށެވެ.
މީގެއިތުރުން ރާއްޖޭގެ އިގްތިސޯދު ކުރިއެރުވުމަށް ކުރަމުންދާ މަސައްކަތުގެ ތެރެއިން ސަރުކާރުން އެންމެ އިސްކަމެއްދޭ އެއް ކަމަކީ ކުދި އަދި މެދުފަންތީގެ ވިޔަފާރިތައް ކުރިއެރުވުން ކަމަށް ޒާމިރު ވިދާޅުވި އެވެ.
ޕޯޓަލް އިފްތިތާހްކުރުމުގެ ހަފްލާގައި ބީސީސީގެ ޑެޕިއުޓީ މެނޭޖިން ޑިރެކްޓަރު ސާމިހް އާދަމް ވިދާޅުވީ، ދިވެހި އުފެއްދުންތެރިކަން ކުރިއަރުވައިދީ، ރާއްޖެއާއި ބައިނަލްއަގްވާމީ ބާޒާރުތަކުން ފުރުސަތު ހޯދައިދިނުމުގެ ގޮތުން ބީސީސީއިން ގިނަ މަސައްކަތްތަކެއް ކުރަމުންދާ ކަމަށެވެ. އަދި މި ޕޯޓަލްގެ މަގްސަދަކީ ރާއްޖޭގެ އެކި ހިސާބުތަކުގައި ތިބި މަސްވެރިކަމާ ގުޅުންހުރި އުފެއްދުންތައް އުފައްދާ ފަރާތްތަކަށް ވާދަވެރި ވިޔަފާރީގެ ފުރުސަތުތަކެއް ފަހިކޮށްދިނުން ކަމުގައި އޭނާ ވިދާޅުވި އެވެ.
މަހަ މިޕޯޓަލްގައި ރަޖިސްޓާ ކުރުމުގެ ފުރުސަތު މިހާރު ވަނީ ހުޅުވާލާފަ އެވެ. ބީސީސީން ބުނީ، މި ޕޯޓަލް އާއެކު ދިވެހީންގެ ފަންނީ އަދި އީޖާދީ ވިސްނުމާއި ތަފާތު އުފެއްދުންތައް މި ސިނާއަތުން ފެނިގެން ދާނެ ކަމަށް އުއްމީދު ކުރާ ކަމަށެވެ.
