ފަހުމީ މިއަދު އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ މިސްކިތްތަކުގައި ބޭނުންކުރާ ކަރަންޓަށް ބިލްކުރުން ޑޮމެސްޓިކް ރޭޓަށް ބަދަލުކުރެއްވުމަށް ރައީސް ޑރ.މުއިއްޒު ނިންމެވި ނިންމެވުމަށް މަރުހަބާ ދަންނަވާ ކަމަށެވެ.
ރޭ ކުޅުދުއްފުށި ސިޓީގައި ރައީސް ވިދާޅުވި ފަދައިން މާލެ ސަރަހައްދާއި ސްޓެލްކޯއިން ކަރަންޓުގެ ހިދުމަތްދޭ އެހެން ރަށްރަށުގައިވެސް ކުރިއަށް އޮތް މަހުން ފެށިގެން މިސްކިތްތަކުގައި ބޭނުންކުރާ ކަރަންޓަށް ބިލްކުރަމުންދާނީ ޑޮމެސްޓިކް ރޭޓުން ކަމަށް ފަހުމީ ވިދާޅުވި އެވެ.
ކައުންސިލްތަކުގެ ބަޖެޓުން ކަރަންޓަށް ކުރާ ހޭދަ ކުޑަކޮށްދިނުމުގެ ގޮތުން އަންނަ މަހުން ފެށިގެން މިސްކިތްކަުގެ ކަރަންޓް ބިލް ޑޮމެސްޓިކް ރޭޓަސް ބަދަލުކުރަން ނިންމާ ރައީސް ޑރ. މުހައްމަދު މުއިއްޒު އެކަން އިއުލާންކުރައްވާފައިވަނީ ކުޅުދުއްފުށީ ރައްޔިތުންނާއި ބައްދަލުކުރައްވާ ދެއްކެވި ވާހަކައިގެ ތެރެއިންނެވެ.
ރައީސް ވިދާޅުވީ، ހަމައެކަނި މިސްކިތްތަކުގެ ބިލުތައް ކުޑަ ކޮށްގެން ވެސް ކައުންސިލްތަކުން ކުރަން ޖެހޭ ހަރަދުތައް ކުޑަވެގެން ދާނެ ކަމަށެވެ. އޭގެ ސަބަބުން ސްޓެލްކޯ އަދި ފެނަކައަށް ބޮޑު އެއްޗެއް ގެއްލޭނެ ކަމަށާއި، ނަމަވެސް އެތަންތަނަށް އާމްދަނީ ވައްދާނެ އެހެން ގޮތްތައް ހޯދާނެ ކަމަށް ވެސް ވިދާޅުވި އެވެ.
