މި މައްސަލަ މިއަދު މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ. މައްސަލަ ހުށަހަޅުއްވަމުން އޭނާ ވިދާޅުވީ 100 ދުވަހުގެ ވައުދުތަކުގެ ތެރެއިން 35 ޕަސެންޓް ވައުދު ފުއްދާފައިވާ ކަމަށް ސަރުކާރުން ބުނި ނަމަވެސް އެއީ ބޮޑު ދޮގެއް ކަމަށެވެ.
މީގެ އިތުރުން، މި މައްސަލައިގައިވަނީ ރާއްޖޭގެ އިގުތިސާދާ ގުޅޭ ގޮތުން ހުރި ކަންބޮޑުވުންތައް ވެސް ފާހަގަކޮށްފަ އެވެ.
އެ މައްސަލައިގައި ބުނީ "ނިމިދިޔަ ސަރުކާރުން ބޭރު ގައުމުތަކުންނާއި ބައިނަލްއަގްވާމީ އިދާރާތަކުން ނަގާފައިވާ ދަރަނިތައް ރީފައިނޭންސް ކުރުމުގެ މަސައްކަތް ފަށާނެ ކަމަށް ބުނި ނަމަވެސް ޑެޓް ރީފައިނޭންސް ކުރުމުގެ އެއްވެސް މަސައްކަތެއް ކުރިއަށް ނުގެންދެވި (ސަރުކާރަށް) 100 ދުވަސް ނުވަނީސް ދައުލަތް ދަރުވާލައި އައިއެމްއެފްގެ ޕެކޭޖަކަށް އެއްބަސްވެފައިވާ ކަމަށް އަޑުފެތުރިފައިވާއިރު، އިވެސްޓްމެންޓް ޑިވަލޮޕްމެންޓް ބޭންކެއް ގާއިމުކުރުމަށް ބޭނުންވާ ޕޮލިސީ ފްރޭމްވޯކް އެކުލަވާލަން ރޭވި ނަމަވެސް މިއީ ކުންފުންޏާ ބެހޭ ގާނޫނުގެ ދަށުން ހަދާފައިވާ ޕޭޕަ ކޮމްޕެނީއެއްކަން ހާމަވެފައިވާ،" ކަމަށެވެ.
އަދި، އެކި ދާއިރާތަކުގެ އޮނިގަނޑު އިސްލާހު ކުރުމަށް މަޖިލީހަށް ހުށަހަޅާނެ ކަމަށް ބުނި ނަމަވެސް، 99 ޕަސެންޓް ބިލް ހުށަހަޅާފައި ނުވާ ކަމަށެވެ. އޭގެ ބަދަލުގައި ރައީސް ޑރ. މުހައްމަދު މުއިއްޒު ގެންދަވަނީ މަޖިލީހުގެ ނިންމުންތަކަށް ގޮންޖައްސަވަމުން ކަމަށް ވެސް ވިދާޅުވި އެވެ.
މިއަދުގެ މަޖިލިސް ޖަލްސާއަށް ހާޒިރުވެ ތިބި 59 މެންބަރުންގެ ތެރެއިން 43 މެންބަރުން ވަނީ މި މައްސަލައަށް ބަހުސް ކުރުމަށް ވޯޓު ދެއްވާފައެވެ. މައްސަލައާ ދެކޮޅަށް ވޯޓު ދެއްވީ 14 މެންބަރުންނެވެ.
