އެމަނިކުފާނު މިހެން ވިދާޅުވި 20 ވަނަ ރައްޔިތުންގެ މަޖިލީހަށް އެމްޑީޕީން ވާދަކުރައްވާ ކެންޑިޑޭޓުންނަށް ތާއިދު ހޯދުމަށް ޕާޓީގެ ހަރުގޭގައި ބޭއްވި ޖަލްސާގައި ވާހަކަފުޅުދައްކަވަމުން ނެވެ.
ރައީސް ސޯލިހު ވިދާޅުވީ ރޯދަމަހު އިންތިހާބު ނުބޭއްވޭހެން ގެނައި އިސްލާހު ރައީސް ޑރ. މުއިއްޒު އެންމެ ފަހުން ތަސްދީގުކުރެއްވުމާއެކު، ފަސްކުރަންޖެހުނު މަޖިލިސް އިންތިހާބު އެޕްރީލް 21ވާ، އާދިއްތަ ދުވަހު ބާއްވަން އިލެކްޝަންސް ކޮމިޝަނުން ނިންމީ، ރައީސް ޑރ. މުއިއްޒުގެ ނުފޫޒާއެކުކަމަށެވެ.
އެ މަނިކުފާނު ވިދާޅުވީ ބޮޑެތި އިންތިހާބުތަކުގައި، އަބަދުވެސް ވޯޓުލުން ބާއްވަނީ ސަރުކާރު ބަންދު ދުވަހެއްގައި ކަމަށާއި، އެއީ ވީހާ ވެސް ގިނަ ރައްޔިތުންނަށް ފުރުސަތު ދިނުމަށް ކަމަށެވެ.
އެއާއެކު ރައީސްގެ ނުފޫޒަށް ތަބާނުވުމަށް ސޯލިހު ވަނީ އިލެކްޝަންސް ކޮމިޝަނުގެ މެމްބަރުންނަށް ގޮވައިލައްވައިފައެވެ.
މި ހުރިހާ ކަމަކާއިއެކު މަޖިލީހުގެ އަގުލަބިއްޔަތު އެމްޑީޕީއަށް ހޯދުމަކީ ރައްޔިތުންނަށްޓަކައި ކުރަންޖެހޭ ކަމެއްގެ ގޮތުގައި ފާހަގަ ކުރައްވައި ރައީސް ސޯލިހު ވިދާޅުވީ ހަތަރު ދާއިރާއެއް ފިޔަވައި ކޮންމެ ދާއިރާއަކަށް ވެސް އެމްޑީޕީގެ ކެންޑިިޑޭޓުން ކުރިމަތިލާނެ ކަމަށާއި، ހުރިހާ ރައްޔިތުން ވެސް ވޯޓު ދޭންވާނީ އެ ކެންޑިޑޭޓަށް ކަމަށް އެ މަނިކުފާނު ވިދާޅުވި އެވެ.
