މުހުތާޒް ކޮށްފައިވާ ޓްވީޓެއްގައި ބުނެފައިވަނީ، ހުވަދު އަތޮޅު އުތުރުބުރީ ދާންދޫ، ނިލަންދޫ އަދި މާމެންދޫގެ އެއްވެސް ރައްޔިތަކު ކޮވިޑް19 ގެ ހާދިސާ އާއި ގުޅިގެން ގާނޫނާއި ހިލާފަށް ވަޒީފާއިން ވަކިކޮށްފައިވާކަމުގައި ވާނަމަ އެފަރާތަކަށް ހިލޭ ގާނޫނީ އެހީތެރިކަން ފޯރުކޮށްދިނުމަށް ނިންމާފައިވާކަމަށެވެ.
ކޮވިޑް19 އާއި ގުޅިގެން ރިސޯޓްތަކުގައި މަސައްކަތްކުރާ ބައެއް މުވައްޒަފުންނަށް ނޯޕޭ ލީވް ނެގުމަށް މަޖުބޫރުކުރާކަމަށާއި، އަދި ބައެއްފަރާތްތަކުން ވަޒީފާއިން ވަކިކުރާކަމުގެ ޝަކުވާތައް ވަނީ އިތުރުވެފައެވެ
ލޭބާރިލޭޝަންސް އޮތޯރިޓީން ބުނެފައިވަނީ ކޮވިޑް19 އާއި ގުޅިގެން ވަޒީފާގެ ގިނަ މައްސަލަތަކެއް ފެންމަތިވަމުންދާކަން އިނގޭކަމަށެވެ. އަދި އެ މައްސަލަތައް ލޭބާރިލޭޝަންސް އޮތޯރިޓީން ބަލަމުންދާކަމަށާއި، އެގޮތުން ގާނޫނާއި ހިލާފަށް އަމަލުކޮށްފައިހުރި ގިނަ މައްސަލަތަކެއް އެބަހުރިކަން އެ އޮތޯރިޓީން ފާހަގަކުރެއެވެ.
އަދި މިހާލަތުގައި ވަޒީފާއާއި ގުޅުންހުރި 219 މައްސަލައެއް ޖޮބްސެންޓަރުގައި ވެސް ރަޖިސްޓްރީ ކޮށްފައިވާކަމަށް ސަރުކާރުން މައުލޫމާތުދީފައިވެއެވެ.
