ރަސްމީ ދަތުރުފުޅެއްގެ ނަމުގައި ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ ކެމްޕެއިނު ދަތުރުތަކުގެ ތެރެއިން މ. ދިއްގަރުގައި އިއްޔެ ބޭއްވި ބައްދަލުވުމެއްގައި އާދަމް ޝަރީފް ވިދާޅުވީ ރައީސް މުއިއްޒުގެ ގާނޫނީ ޒިންމާ އަދާ ކުރެއްވުމަށް އޮތް އެންމެ ބޮޑު ހުރަހަކީ މަޖިލިސް ކަމަށާއި މަޖިލީހުގައި މިއަދު ހުންނެވި ނަމަ މަޖިލިސް މެންބަރެއްގެ ދަތްދޮޅި ދުއްވާނުލައި ހުރެވޭނެތޯ ސުވާލު އުފެދޭ ކަމަށެވެ.
މިނިސްޓަރުގެ މި ވާހަކަތަކަށް ގިނަބައެއްގެ ފާނޑުކިޔުން އަމާޒު ވުމުން މިއަދު "އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި އެހެން ވިދާޅުވީ އެބޭފުޅާއާ ގުޅުވައިގެން ކިއާ އެއްޗަކަށްވާތީ "ހިއުމާ" އެއްގެ ގޮތުން ކަމަށެވެ. އެހެން ގޮތަކަށް އެ ބޭނުން ކުރެއްވި ބަސް މީހުންނަށް ވިސްނި ވަޑައިގަންނަވާ ނަމަ އެކަމަށް މައާފަށް އެދޭ ކަމަށް ވިދާޅުވި އެވެ.
މަޖިލިސް މެންބަރުންގެ "ދަތްދޮޅި ދުއްވާނުލައި" ހުރެވިދާނެތޯ ސުވާލު އުފައްދަވައި އާދަމް ޝަރީފު އިއްޔެ ވާހަކަ ދެއްކެވީ ރައީސް އައްޔަން ކުރެއްވި ބައެއް ވަޒީރުންނަށް މަޖިލީހުން ރުހުން ނުދިނުމުންނާއި ފުށިދިއްގަރު ފަޅު ހިއްކުމަށް ބޭނުންވާ ފައިސާ ބަޖެޓުން އުނި ކުރުމާ ގުޅުވަ އެވެ.
