ދިއްގަރުގައި ވާހަކަދައްކަވަމުން އާދަމް ޝަރީފް ވިދާޅުވެފައިވަނީ މަޖިލީހުގެ ސަބަބުން ރައީސް މުއިއްޒަށް، އެ މަނިކުފާނުގެ ތަސައްވަރާއި ސިޔާސަތުތައް ތަންފީޒުކުރެއްވުމަށް ގޮންޖެހުންތަކެއް އެބަހުރި ކަމަށެވެ.
އެކަމާ ގުޅިގެން މަޖިލީހުން މިއަދު ނެރުނު ނޫސްބަޔާނެއްގައި ބުނީ މަޖިލީހުގެ މެމްބަރުންނާއި ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދިނުމަކީ ސަރުކާރުގެ ޒިންމާއެއް ކަމަށެވެ. ސަރުކާރުގެ މިނިސްޓަރަކު މަޖިލީހުގެ މެމްބަރުންނަށް ޖިސްމާނީ އަނިޔާދިނުމަށް ހިތްވަރު ލިބޭ ފަދަ ގޮތަކަށް ވާހަކަދެއްކެވުމުން މަޖިލީހުގެ ރައީސް މުހައްމަދު އަސްލަމް ކަންބޮޑުވެވަޑައިގަންނަވާ ކަމަށް މަޖިލީހުން ބުންޏެވެ.
އެ ބަޔާނުގައި ވަނީ މެންބަރުންގެ ސަލާމަތާއި ރައްކާތެރިކަން ކަށަވަރު ކުރުމަށް ކުރަމުންދާ މަސައްކަތަށް ސަރުކާރުން ފުރިހަމަ އެއްބާރުލުން ދިނުމަށް ގޮވާލާފައެވެ. އަދި އެއްވެސް ފަރާތަކުން މަޖިލީހުގެ އިމްތިޔާޒަށް އަރައިނުގަތުމަށް އިލްތިމާސް ކޮށްފައި ވެއެވެ.
މި ވާހަކަތަކާ ގުޅިގެން އާދަމް ޝަރީފަށް ފިޔަވަޅު އަޅަން މަޖިލިސް ބައެއް މެމްބަރުން ގޮވާލާފައިވާއިރު، އާދަމް ޝަރީފް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އިއްޔެ ދެއްކެވި ވާހަކައިގައި "ދަތްދޮޅި" މި ބަސް ބޭނުން ކުރީ އެއްވެސް ހާލަތެއްގައި ހަމަނުޖެހުމަށް ހިތްވަރު ދިނުމުގެ ބޭނުމުގައި ނޫން ކަމަށެވެ. ދަތްދޮޅީގެ ވާހަކަ އަކީ އޭނާއާ ގުޅުވައިގެން ކިޔާ އެއްޗަކަށް ވާތީ ސަމާސާ އަކަށް އެ ބަސް ބޭނުން ކުރެއްވީ ކަމަށް މިނިސްޓަރު ވިދާޅުވި އެވެ.
