ރޯދަމަހާއި ދިމާކޮށް މާލެ އާއި ހުުޅުމާލޭގެ މަގުތަކަށް އެތައް ކުންޏެއް ވަނީ އަޅާފައެވެ. އެތަކެތި ނެގުމުގެ މަސައްކަތް ސިޓީ ކައުންސިލުން ކުރަމުން އަންނައިރު އަދިވެސް ބައެއް ސަރަހައްދުތަކުގައި ފުނި ފުންޏަށް ކުނި އެބަ ހުއްޓެވެ.
މިދިޔަ އާދިއްތަ ދުވަހު މާލޭ ގެ މަގުމަތިން 60 ޓަނުގެ ކުނި ނަގާފައިވާކަން ހާމަކުރިތާ 24 ގަޑިރުވެސް ނުވަނީސް މާލޭ މޭޔަރު އާޒިމް ވިދަޅުވީ ރޯދަމަހުގެ ފުރަތަމަ ދުވަހު 4 ގަޑިއިރުގެ ތެރޭގައި 22.5 ޓަނުގެ ކުނި މާލޭގެ މަގުތަކުން ނަގައިފައިވާކަމަށެވެ. އަދި މިިދިޔަ 16 ދުވަހުގެތެރޭގއި 222.5 ޓަނުގެ ކުނި މާލެތެރެއިން ނަގާފައިވާކަމަަށްވެސް އާޒިމް ވިދާޅުވިއެވެ.
މުޅި މާލެ ގޮނޑުވެ އެކި ސަރަހައްދުތަކުގައި ކުނިތައް ފުނިޖެހިފައިވާތީ އެތައް ބައެއް އަންނަނީ ކަންބޮޑުވުން ފާޅުކުރަމުންނެވެ. މުޅި މާލޭގައި ކެމަރާ ހަރުކޮށްފައި ހުންނައިރު ކުނި މަގުތަކަށް އަޅާ މީހުން ފުލުހުންނަށް ހޯދޭނެކަމަށްވެސް އަންނަނީ ބުނަމުންނެވެ.
އަދި މަގުތަކަށް ކުނި އުކާ މީހުންގެ ވީޑިއޯތައް އާއްމުކޮށް ފިޔަވަޅު އެޅުމަށްވެސް މީހުން އަންނަނީ ގޮވާލަމުންނެވެ.
މީގެކުރިން މާލޭގެ މަގުތަކަށް ކުނި އަޅާ މީހުންގެ ހޯދާ އެމީހުން ޖޫރިމަނާކޮށްފައިވެއެވެ.
މާލެ އިން ކުނި ނެރޭވަރު އިތުރުވެ މާލެ ގޮނޑުވާން ފެށުމުން ވެމްކޯއިން ވަނީ ގޭތެރެއިން ނެރޭ ކުނިތައް ހިލޭ އުކޭނެ އިންތިޒާމުވެސް ހަމަޖައްސާދީފައެވެ. އެ ގޮތުން މިރޭ ދަންވަރު12 ޖަހަންދެން ހިލޭ ކުނި އުކޭނެކަމަށް ވެމްކޯއިން ބުނެއެވެ.
