ދިވެހިރާއްޖޭގެ ސަރަހައްދު ބެލެހެއްޓުން ދިވެހިންގެ އަތްމައްޗަށް ގެންނަން ޑރ. މުހައްމަދު މުއިއްޒު ވެޑައިގެންނެވި ވައުދާ އެއްގޮތްވާ ގޮތުގެ މަތިން މިރޭ ނ. މާފަރުގައި ބޭއްވި ހާއްސަ ރަސްމިއްޔާތެއްގައި ސިފައިންގެ ވައިގެ ބާރު "އެއާ ކޯ" އިފްތިތާހު ކޮށްދެއްވާ ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނުގެ އަމާޒަކީ ހުރިހާ މާނައެއް ގައި ދިވެހި ސިފައިންގެ ހިދުމަތް ވަރުގަދަކޮށް ފުޅާ ކުރެއްވުން ކަމަށެވެ.
ރައްޔިތުންްގެ ހައްގުގައި އަސްކަރިއްޔާއަށް ދޭން ޖެހޭ އިސްކަން ދެއްވާނެ ކަމަށް ވިދާޅުވި އެވެ. މިރޭ އިފްތިތާހު ކުރެވުނު "އެއާ ކޯ" ގައި ބޭނުން ކުރާނީ އެންމެ ޒަމާނީ ވަސީލަތްތަކާއި އުޅަނދުތައްކަން ފާހަގަ ކުރައްވާ ރައީސް ވިދާޅުވީ ކޯސްޓްގާޑްގެ އުޅަނދުތައް ވެސް އިތުރަށް ފުރިހަމަ ކުރައްވާ ކޯސްޓްގާޑްގެ ފްލީޓް ވެސް ވަރުގަދަ ކުރައްވާނެ ކަމަށެވެ.
އެމަނިކުފާނު ވިދާޅުވީ ކޯސްޓުގާޑުގެ ގާބިލްކަން ދެގުނަ ކުރުމަށްޓަކައި ތުރުކީއާއި އެހެނިހެންވެސް އެކުވެރި ގައުމުތަކާއެކު މަޝްވަރާތައް ކުރިއަށް ގެންދަވާނެ ކަމަށެވެ. އަދި ދިވެހިން އަމިއްލައަށް ރާއްޖޭގެ ސަރަހައްދު ބެލެހެއްޓުމަކީ އެހެން ބަޔަކު ކަންބޮޑުވާންޖެހޭ ކަމެއް ނޫން ކަމުގައިވެސް ވިދާޅުވި އެވެ.
