ހިޔާ ފްލެޓްތަކުގެ އިތުރު ލިފްޓް ހަރުކޮށް ނިމެނޭ ތާރީހާއި ގުޅޭގޮތުން މީހަކު ކުރި ސުވާލަށް "ރައީސްގެ ޖަވާބު"ގައި ރައިސް ވިދާޅުވީ، ހިޔާ ފްލެޓްތަކުގައި އިތުރު ލިފްޓް ހަރު ކުރުމަކީ އެމަނިކުފާނު ވެވަޑައިގެންނެވި ވައުދެއް ކަމަަށާއި، އެ މަސައްކަތް ކުރުމަށް ބަޔަކާއި ހަވާލުވެސް ކުރެވިފައިވާ ކަމަށެވެ.
މި ލިފްޓުގެ އަމަލީ މަސައްކަތް ވީހާވެސް އަވަހަކަށް ނިންމާލަން ސަރުކާރުން ބާރު އަޅަމުންދާނެ ކަމަށް ރައީސް ވިދާޅުވި އެވެ.
ސަރުކާރުން އެ ކުންފުންޔާ އެޑްވާންސް ޕޭމަންޓް ވަރަސް އަވަހަށް ދައްކާނެ ކަމަށާއި އެގްރިމެންޓުގައިވާ ގޮތުން އެ ޕޭމަންޓު ދޭތާ އެއްމަސްތެރޭގައި މި ލިފްޓުތައް މޮބިލައިޒް ކުރަން ޖެހޭނެ ކަމަށް ރައީސް ވިދާޅުވި އެވެ.
ހިޔާ ފްލެޓްތަކުގައި އިތުރު ލިފްޓުތައް ހަރުކުރުމަށް އެޗް.ޑީ.ސީން ހަވާލުކޮށްފައިވަނީ ޝެންޔަންގް ޔުއާން އިންޓެލެކްޗުއަލް ގުރޫޕާއެވެ. ހިޔާގެ 16 ޓަވަރު ހުންނައިރު އެއިން ކޮންމެ ޓަވަރަކަށް 2 ލިފްޓް އިތުރުކުރުމަށް ރައީސް ވަނީ ނިންމަވާފަ އެވެ. އެހެންކަމުން ޖުމުލަ 32 ލިފްޓް ބެހެއްޓުމަށް ހަމަޖެހިފައިވެ އެވެ. އެއީ ސްޓްރެޗަރ ނުވަތަ ބަލިމީހުން އުފުލޭނެ ލިފްޓަކާއި، 14 މީހުންގެ ޖާގައިގެ ލިފްޓެކެވެ.
