ވިހިވަނަ ރައްޔިތުންގެ މަޖިލިހުގެ އިންތިހާބުގައި ލިބިވަޑައިގަތް ކާމިޔާބީ ފާހަގަކުރަން ރޭ ފޮނަދޫގައި ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުން އަބްދުއްރަހީމް ވިދާޅުވީ ލަހެއް ނުވެ ހައްދުންމަތީގެ ތާރީހު ބަދަލުވެގެންދާނެ ކަމަށެވެ.
އަބްދުއްރަހީމް ވިދާޅުވީ ގޮތުން ސިޔާސީ ގޮތުން މިއަދު ހުރި ހިސާބަށް އާދެވިފައިވަނީ ފޮނަދޫގެ ރައްޔިތުންގެ ކުރި ތާއީދާއި އިތުބާރާއި އެހީތެރިކަން ކަމަށެވެ.
ސިޔާސީގޮތުން މިއަދު ހުރި ހިސާބަށް އާދެވިފައި ވަނީ ފޮނަދޫގެ ރައްޔިތުން ކުރި ތާއީދާއި އިތުބާރާ އަދި އެހީތެރިކަމުގެ ސަބަބުން ކަމަށް އަބްދުއްރަހީމް ވިދާޅުވި އެވެ. އަބްދުއްރަހީމް ވިދާޅުވެފައި ވަނީ ކޮންމެ މަގާމަކަށް ދިޔަ ނަމަވެސް އޭނާގެ ހަނދާނުގައި އެކަން ހުންނާނެ ކަމަށެވެ.
އަބްދުއްރަހީމްގެ ދަރިކަލުން އަދި ޓޫރިޒަމް މިނިސްޓަރު އިބްރާހިމް ފައިސަލް ވެސް ވަނީ މަޖިލިހުގެ ރައީސްކަމުގެ ގޮނޑިއަށް އޭނާގެ ބައްޕަ ވަޑައިގަންނަވާނެ ކަމުގެ ޔަގީންކަން ދެއްވާފަ އެވެ. މެއި 28 ވަނަ ދުވަހުގެ ފަހުން ލ. އަތޮޅުގައި އުފާފާޅުކުރާނެ ކަމަށާއި އެކަމުގެ އިންތިޒާރުގައި އަތޮޅުގެ ރައްޔިތުން ތިބުމަށް އޭނާ ވަނީ އެދިވަޑައިގެންފަ އެވެ.
ރައްޔިތުންގެ މަޖިލިހަށް އިންތިހާބުވި 93 ބޭފުޅުން ހުވާކުރެއްވުމަށް ފަހު، ފުރަތަަމަ ކަަމަކަށް އޮންނާނީ މަޖިލިހުގެ ރައީސާއި ނައިބު ރައީސް އިންތިހާބު ކުރުމެވެ. އެކަން ކުރާނީ މެންބަރުންގެ މެދުގައި ނަގާ ސިއްރު ވޯޓަކުންނެވެ.
ވިހިވަނަ މަޖިލީހުގައި ޕީއެންސީއަށް ނިސްބްތްވެވަޑައިގަންނަވާ 73 މެންބަރުން އެބަތިބި އެވެ. އެހެން ކަމުން މަޖިލިސް ރައީސްކަމަށް އަންނާނީ، ޕީއެންސީގެ ފަރާތުން އެންޑޯސް ކުރާ ބޭފުޅެކެވެ.
