ސޯޝަލް މިޑިއާގައި އެންމެ ނުފޫޒު ގަދަ އެޕަކީ ކުރިން ޓްވިޓަރގެ ނަމުގައި ބޭނުންކޮށް މިހާރު އެކްސްގެ ގޮތުގައި ބޭނުންކުރަމުން އަންނަ އެޕެވެ. 

އެކްސް އިން އާއްމުކުރި ތަފާސް ހިސާބުތައް ދައްކާގޮތުން ދުވާލަކު 1.7 މިލިއަން މީހުން މުޅިން އަލަށް އެކްސްއާ ގުޅެއެވެ. މި އަަހަރުގެ މިހާތަނަށް އެވްރެޖްކޮށް ދުވާލެއްގެ މައްޗަށް 8 ބިލިއަނަށްވުރެ ގިނަ އެކްޓިވް ޔޫޒަރ މިނިޓް އެކްސްގައި ހުރިއިރު، މިއީ މިދިޔަ އަހަރާ އަޅާބަލާއިރު 10 އިންސައްތައިގެ އެރުމަށްކަމަށް އެކްސްއިން ބުނެއެވެ. 

އެކްސްގައި މީހުން ހޭދަ ކުރާ ވަގުތަށް ބަލާއިރު މިއަހަރު ދުވާލެއްގެ މައްޗަށް އެކްސް ބޭނުންކުރާ ވަގުތު 13 އިންސައްތަ ވަނީ އިތުރުވެފައެވެ. އަދި ފާއިތުވި 6 މަހަށް ބަލާއިރު މޮބައިލުން ވަގުތު ހޭދަކުރާ މިންވަރު 17 އިންސައްތައަށް އިތުރުވެފައިވާކަމަށްވެސް އެކްސް އިން ބުނެއެވެ. 

އެކްސްގެ ހިސާބުތައް ދައްކާގޮތުން އެ އެޕް ބޭނުންކުރާ މީހުންގެ އަދަދު 250 މިލިއަނަށްވުރެ މައްޗަށް އަރައެވެ. އަދި އަހަރަކު 550 މިލިއަން މީހުން ޒިޔާރަތްކުރާކަމަށްވެސް އެ އެޕުން ބުނެއެވެ. 

އެކްސް ބޭނުންކުރާ މީހުން އެވްރެޖްކޮށް ދުވާލެއްގެ މައްޗަށް 30 މިނެޓު އެކްސްގައި ހޭދަކުރާކަމަށްވެސް ދިރާސާތަކުން ދައްކައެވެ.