އިންތިހާބުތަކަށް ކުރިމަތިލާ ކެންޑިޑޭޓުންގެ ޝަރުތުތަކުގެ ތެރޭގައި ސާބިތު ދަރަނީގެ ވާހަކަ ރައްޔިތުންގެ މަޖިލީހުން ހިމަނާފައި އޮތީ ސިޔާސީ ސަކަރާތެއްގެ ތެރެއިން ރަނގަޅު ނިޔަތެއްގައި ނޫން ކަމަށާއި އެއީ ޖެއްސުމަށް ކޮށްފައި އޮތް ކަމެއް ކަމަށް އިލެކްޝަންސް ކޮމިޝަނުން ބުނީ، ސުޕްރީމް ކޯޓުގައި، ކެންޑީޑޭޓެއްގެ ޝަރުތާ ގުޅޭ ގޮތުން އޮތް ޝަރީއަތެއްގައި މިއަދުއެވެ. ސުޕްރީމް ކޯޓުގައި މިގޮތަށް ވާހަކަ ދެއްކެވީ އިލެކްޝަންސް ކޮމިޝަންގެ ވަކީލު މަހްފޫޒް ސައީދު އެވެ.
މަހްފޫޒު ސައީދު މިހެން ވިދާޅުވީ، ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ހެންވޭރު މެދު ދާއިރާއަށް އަމިއްލަ ގޮތުން ވާދަކުރައްވާ ހަސަން ޝިޔާމްގެ ކެންޑިޑަސީގެ ސައްހަކަމާ މެދު ސުވާލު އުފައްދާ، ސުޕްރީމް ކޯޓަށް ހުށަހެޅި މައްސަލާގައި މިއަދު ބޭއްވި ފުރަތަމަ އަޑުއެހުމުގަ އެވެ. ހަސަން ޝިޔާމް އާއި އީސީއާ ދެކޮޅަށް ހުށަހަޅާފައިވާ މި މައްސަލާގައި ބުނެފައިވަނީ، ޝިޔާމްގެ ކެންޑިޑަސީ އީސީން ބަލައިގެންފައިވަނީ، ސާބިތު ދަރަންޏެއް އޮވެ، ހުކުމާ އެއްގޮތަށް ފައިސާ ދައްކަމުން ނުދާ މީހަކަށް ވުމުން ކެންޑިޑޭޓެއްގެ ޝަރުތު ހަމަނުވާ ކަމަށް ބެލުމެއް ނެތި ކަމަށެވެ.
އެ ކަމާ ގުޅޭ ގޮތުން ކޮމިޝަންގެ ވަކީލު ވިދާޅުވީ ސާބިތު ދަރަނީގެ ވާހަކަ ގާނޫނު އަސާސީގައި ލިޔުނީ ޖެއްސުމަށް ކަމަށެވެ.
މި މައްސަލައިގެ އަޑު އެހުންތައް މިއަދު ސުޕްރީމް ކޯޓުން ނިންމާލާފައިވާއިރު، މި ހަފްތާ ތެރޭގައި ހުކުމް ކުރާނެ ކަމަށް ބެލެވެއެވެ.