ހޮޅުދޫ ދާއިރާގެ ޕީއެންސީ ކެންޑިޑޭޓު އަބްދުއްސައްތާރު މުހައްމަދު (ސަޓޯ)ގެ ޖަގަހަ ހުޅުވުމަށް ބޭއްވި ރަސްމިއްޔާތެއްގައި ރައީސް ވިދާޅުވީ ސޮވްރިން ފަނޑުގައި ހުރި ޑޮލަރު ކުރީގެ ސަރުކާރުން ރުފިޔާއަށް ބަދަލުކުރި ކަމަށާއި އެކިކަހަލަ ބޭނުންތަކަށް ބޭނުން ޖެހުނީމަ ބޭނުން ކުރާ އެއްޗަކަށް ހެދިނަމަވެސް މިސަރުކާރުން އެފަންޑު ހިމާޔަތްކުރުމަށް ވީ ވައުދާއެއްގޮތަށް މަސައްކަތް ފެއްޓެވިކަމަށެވެ.
މިއީ ރާއްޖޭގެ އިގްތިޞާދު ހަމަމަގަށް އެޅުވުމަށް ކޮންމެހެން ކުރަން ޖެހޭ ކަމެއް ކަމަށް ރައީސް ވިދާޅުވިއެވެ. އެހެންކަމުން މި ސަރުކާރުން މަޖިލީހަށް ފޮނުވި އެންމެ ފުރަތަމަ ބިލަކީ ވެސް ސޮވަރިން ޑިވެލޮޕްމަންޓު ފަންޑުގެ ބިލު ކަމަށް އެ މަނިކުފާނު ވިދާޅުވިއެވެ.
އެމަނިކުފާނު ވިދާޅުވީ، އެމްޑީޕީ ސަރުކާރުން ވަނީ މި ފަންޑު ވިއްސިވިހާލި ކޮށްލާފައި ކަމަށާއި މި ފަންޑު ހަމަމަގަށް އެޅުވީ މިސަރުކާރުން ކަމަށެވެ.
އިސްލާމްދީނުގެ ވާހަކަ ދައްކައި ފަސް ވަގުތު ނަމާދު އަދާކުރުމަށް ޕޯޑިއަމްތަކުގައި ގޮވާލާތީ އެ މަނިކުފާނަށް ފުރައްސާރަ ކުރައްވާ ކަމަށާއި ނަމަވެސް އެކަމާ ކަންބޮޑުވެވަޑައިނުގަންނަވާ ކަމަށް ވެސް ރައީސް ވިދާޅުވި އެވެ.
ރައީސް ވިދާޅުވީ، ދިވެހިންގެރާއްޖެއަށް ކުރާ ދަތުރުގައި ފުރުސަތު ދޭން ޖެހެނީ އިސްލާމްދީނަށް ނަސްރު ދޭ މީހުންނަށް ކަމަށެވެ.
ރައްޔިތުންގެ މަޖިލީހުގައި އަދިވެސް ބޮޑު މެޖޯރިޓީއެއް އޮންނަނީ މިހާރުގެ އިދިކޮޅު ޕާޓީ އެމްޑީޕީ އަތުގަ އެވެ.
