"ރައީސްގެ ޖަވާބު" ޕްރޮގްރާމުގައި، މީހަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ، ކޮންމެ ވައުދެއްވީ ފުއްދޭނެކަން ޔަގީންވެ، ފުއްދޭނެ ގޮތް އެނގިވަޑައިގަންނަވާތީ ކަމަށެވެ. އެގޮތުން ވެރިކަމުގެ ފުރަތަމަ 14 ހަފުތާއަށް ވެފައިވާ ވައުދުތައް ވެސް މިހާރު ގާތްގަނޑަކަށް އެކީ ނިމިފައި ވާކަމަށް ރައީސް ވިދާޅުވިއެވެ.
މިއަހަރަށް ފާސްކުރި ބަޖެޓުގައި ސަރުކާރުން އެދުނު މުހިންމު މަޝްރޫއުތައް ބަޖެޓުން އުނިކޮށްލާފައިވާކަން ފާހަގަކުރައްވަމުން ރައީސް ވިދާޅުވީ ހިނގަ ހިނގާ ހުރި މަޝްރޫއުތައް ކުރިއަށް ގެންދާނެ ފައިސާ ވެސް ހިމަނާފައި ނެތް ކަމަށެވެ.
އެހެންކަމުން މަޖިލީހުގެ އެއްބާރުލުން ނުލިބި ގާނޫނުއަސާސީގެ ތެރެއިން ސަރުކާރަށް ފުރިހަމަކަމާއެކު ވައުދުތައް ނުފުއްދޭނެކަން ރައީސް ފާހަގަކުރެއްވި އެވެ. ސަރުކާރަށް މަޖިލީހުގެ މެޖޯރިޓީ މުހިންމުވަނީ އެހެންވެ ކަމަށް ވެސް ވިދާޅުވި އެވެ.
މަޖިލީހުގެ އަގުލަބިއްޔަތު ވެރިކަން ކުރާ ޕާޓީއަށް ހޯދައިދިނުމަށްޓަކައި ރައީސް ގެންދަވަނީ މަސައްކަތްތަކެއް ކުރައްވަމުންނެވެ. އެގޮތުން ދޮރުން ދޮރަށް ހިންގަވައި، ކެމްޕެއިން ޖަލްސާތަކުގައި އެމަނިކުފާނު ކޮންމެ ދުވަހަކު ބައިވެރިވެ ވަޑައިގަންނަވަ އެވެ.
އަދި ރައީސް މުއިއްޒުގެ ސަރުކާރަށް މަޖިލީހުގެ އަގުލަބިއްޔަތު ލިބިއްޖެނަމަ އަނިޔާވެރިކަން އިޔާދަވާން ފަށާނެކަމަށް ބުނެ އިދިކޮޅު އެމްޑީޕީން އަންނަނީ ޕީޕީއެމް/ޕީއެންސީ ކޯލިޝަނަށް މަޖިލިސް ނުދިނުމަށް ރައްޔިތުންގެ ކިބައިން އެދެމުން ނެވެ.
