ރަސްދޫގެ މިސްކިތެއްގެ ފާހާނާ ތެރޭ ދެ ކުޑަކުއްޖަކު ވެގެން އެހެން ކުއްޖަކަށް ގަނާކޮށް އަނިޔާކުރި މައްސަލަ ފެންމަތިވުމުން ކުޑަކުދިން ގަނާއިން ރައްކާތެރިކުރުމަށް ވަޒީރުންގެ މައްޗަށް އެކުލެވޭ ހާއްސަ ޓާސްކް ފޯހެއް ސަރުކާރުން ވަނީ އެކުލަވާލާފައެވެ.
މި ޓާސްކްފޯސްގައި ހިމެނޭ ދާހިލީ ވަޒީރު އަކީ އިހްސާން ނޫސްވެރިންނާއި ބައްދަލުކުރައްވާ ވާހަކަދައްކަވަމުން ވިދާޅުވީ ރާއްޖޭގައި ކުށްކުރާ 200 އެއްހާ ކުދިން ތިބިކަން ރެކޯޑްތަކުން ދައްކާކަމަށެވެ.
ކުށްތަކަށް ހުށަހެޅޭ ނުވަތަ ކުށުގެ ވެށީގައި ހަރަކާތްތެރިވާ ކުދިން ދައުލަތުގެ ބެލުމުގެ ދަށަށް ގެނެސް ދައުލަތުގެ މަރުކަޒެއްގައި ފަރުވާ ދެވޭނެ ނިޒާމެއް އެކުލަވާލާ އެ ނިޒާމުގެ ތެރެއިން ހާއްސަ ސެންޓަރުތައް ގާއިމުކުރަންޖެހޭނެ ކަމަށް 2019 ވަނަ އަހަރު ވުޖޫދަށް އައި ކުޑަކުދިންގެ އަދުލުގެ ގާނޫނުގައިވެއެވެ.
އިހްސާން ވިދާޅުވީ އެހެންނަމަވެސް ޖަލެއް ފިޔަވައި އިތުރު އެއްވެސް މަރުކަޒެއް އަދި ނިމިފައިނުވާކަމަށެވެ. ވަޒީރު ވިދާޅުވީ މި ސަރުކާރުގެ ވިސްނުމަކީ އެ މަރުކަޒުތައް ވަކި ރަށެއްގައި ގާއިމުކުރުންކަމަށެވެ.
ވަޒީރު އިހްސާން ވިދާޅުވީ ވަކި މުއްދަތެއް ވަންދެން ރިހިބެލިޓޭޝަން ފަރުވާ ދިނުމަށްފަހު ގެންދަންޖެހޭ ހާފްވޭ ހައުސްއަކަށް ހއ. ހޯރަފުށީގައި ހަދާފައި އެބަހުރި ކަމަށެވެ. އެހެންނަމަވެސް އެތަން އަދި ހިދުމަތަށް ގެނެވެން ނެތުނުމުން އެތަން ޖުވައިނަލް ޓްރީމެންޓް ސެންޓަރަކަށް ބަދަލުކުރަން ނިންމށާފައިވާކަމަށްވެސް އޭނާ ވިދާޅުވިއެވެ.
އިހްސާން ވިދާޅުވީ ދައުލަތަށް ނަގާ ކުދިން ނަގާނީ ގާނޫނުގައި ބުނާ ގޮތަށް ކޯޓު ހުކުމެއްގެ ތެރެއިންކަމަސެވެ. އަދި އެގޮތަށް ނަގާ ކުދިން ނެގުމަށްފަހު އެކުދިން ކެއާ ފެސިލިޓީގައި 18 އަހަރުވަންދެން ބަލަހައްޓާނެކަމަށްވެސް ދާހިލީ ވަޒީރު ވިދާޅުވިއެވެ.
