މިނިސްޓަރު ހަލީލް މިހެން ވިދާޅުވެފައިމިވަނީ ދުނިޔޭގެ ސިއްހަތު ދުވަހުގެ މުނާސަބަތުގައި އެމަނިކުފާނު ދެއްވި ހިތާބުގެތެރެއިންނެވެ.
"އަހަރެންގެ ސިއްހަތު - އަހަރެންގެ ހައްގު" ގެ ދަށުން މިއަދު ފާހަގަކުރަމުން އަންނަ ދުނިޔޭގެ ސިއްހަތު ދުވަހާ ގުޅިގެން މިނިސްޓަރު ދެއްވި ހިތާބުގައި ވިދާޅުވީ، ސިއްހަތަކީ ކޮންމެ މީހަކަށް ލިބިފައިވާ ހައްގަކަށް ވާއިރު އެ ހައްގާ އެކު ޒިންމާއެއް ވެސް ވާ ކަމަށެވެ.
މިނިސްޓަރު ވިދާޅުވީ ގިނަ ފަހަރަށް ސިއްހަތަކީ ނުވަތަ ޞިއްހަތުގެ ޙައްޤަކީ، ހަސްފަތާލުތަކާ ސިއްހީ މަރުކަޒުތަކުން ލިބެން ހުންނަ ސިއްހީ ފަރުވާއާއި ހިދުމަތްތައްކަމުގައި ހީވެފައި އޮންނަނަކަމަށާއި އެހެންނަމަވެސް އެއަށްވުރެ ބޮޑަށް ސިއްހަތާއި ގުޅޭކަންކަމަށް ހޭލުންތެރިވާންޖެހޭ ކަމަށެވެ.
މިނިސްޓަރު ވަނީ ސިއްހީ ގޮތުން ރަނގަޅު މައުލޫމާތު ހޯދައި ދުޅަހެޔޮ އާދަތަކަށް މުޖުތަމައު އަހުލުވެރިކުރުވައި ބަލިތަކުން ދުރާލާ ރައްކާތެރިކުރުމަށް ލިބިޖެހޭ ވެކްސިންތަކާއި ބޭސް ބޭނުންކުރުމާއި، ބައްޔެއް ހުރިތޯ ދުރާލާ ދެނެގަތުމަށް ގަވާއިދުން މެޑިކަލް ޓެސްޓުތައް ހެދުމަކީ ފަރުދީ ފެންވަރުގައި ކުރެވިދާނެ ކަންކަން ކަމަށް ވިދާޅުވެފަ އެވެ.
އެ ހިތާބުގައި މިނިސްޓަރު ވިދާޅުވީ ދިވެހިންނަށް އެއްވެސް ތަފާތު ކުރުމެއް ނެތި ހަމަހަމަކަމާ އެކު، އެކަށީގެންވާ އަދި ފެންވަރު ރަނގަޅު ސިއްހީ ފަރުވާ އާއި ސިއްހީ ހިދުމަތްތަކާއި ސިއްހީ ރައްކާތެރިކަމާއި މާލީ އަދި ޖިންމާނީ ގޮންޖެހުންތަކާ ނުލައި ލިބޭނެ ގޮތް ކަށަވަރު ކުރުމަކީ ދައުލަތުގެ ޒިންމާއެއް ކަމަށެވެ. ރާއްޖެ އިން ބައިވެރިވެފައިވާ އިންސާނީ ހައްގުތަކާ ބެހޭ ބައިނަލްއަގްވާމީ ގަރާރުތަކުން އެކަންކަން ކަށަވަރު ކޮށްދޭއިރު އެ ހައްގުތައް ހިމާޔަތްކުރުމަކީ މުޅި ދައުލަތުގެ ޒިންމާއެއް ކަމަށް ވިދާޅުވި އެވެ.