ރައީސް ޔާމީން އިސްވެ ހުންނަވާ އުފެއްދި ޕީއެންއެފް އުފެއްދުމަށް ރޭ ގިޔާސުއްދީން ސްކޫލުގައި ބާއްވަން އުޅުނު ޖަލްސާއަށް ފުލުހުން ހުރަސްއަޅާ ޖަލްސާއަށް ދިޔަ މީހުން ވަނަ ނުދީ ވަނީ ހިފަހައްޓާފައެވެ.9:15 ގައި ބާއްވަން އުޅުނު ޖަލްސާ އެންމެ ފަހުން 12 ޖެހި ފަހުން ފެށީ ތަން ބަދަލުކޮށް ރާޅުގަނޑު ސަރަހައްދުގައެވެ.
މިކަމާއި ގުޅިގެން ކުރީހެ ރައީސް އިބްރާހިމް ސާލިހް އެކްސްގައި ކުރެއްވި ޕޯސްޓެއްގައި ވިދާޅުވީ ޕީއެންއެފް އުފެއްދުމުގެ ޖަލްސާއަށް އެ ޕާޓީގެ މެމްބަރުން ވަނުމަށް ސަރުކާރުން ހުރަސްއެޅުމުން އެކަމާއި ކަންބޮޑުވާކަމަށެވެ. އަދީ ސިޔާސީ ޕާޓީތައް އުފައްދައި، ސުލްހަވެރިކަމާއެކު އެއްވެ އުޅުމާއި، ވެރިކަމުގައި ތިއްބެވި ބޭފުޅުންނާ ޚިޔާލު ތަފާތުވުމުގެ ޙައްޤު، ޤާނޫނު އަސާސީން އެންމެންނަށް ކަށަވަރުކޮށްދީފައި އެބައޮތްކަމަށްވެސް ރައީސް ސާލިހް ވިދާޅުވިއެވެ.
ރޭ އެތަނުގައި ފުލުހުންގެ އެސްއޯ ހަރަކާތެރިވާން ޖެހުނު ސަބަބާއި ފުލުހުން ބާރު ބޭނުންކުރި މިންވަރު ބެލުމަށް ފުލުހުންގެ ކޮމިޝަނަރަށް އަންގާފައިވާކަމަށް ހޯމް މިނިސްޓަރ އަލީ އިހްސާން ވަނީ ވިދާޅުވެފައެވެ.