މަޖިލިސް ކެމްޕެއިންއާ ގުޅިގެން ހިންނަވަރުގައި ޕީޕީއެމް ޕީއެންސީން ބޭއްވި ޖަލްސާއެއްގެ ޕޯޑިއަމްގައި އަހުމަދު އަބަދުއްރަހްމާން (ހަންޓާ އަހުމަދު) ވިދާޅުވީ ފެލިވަރުގައި މަސައްކަތްކުރާ ބޭބޭފުޅުނަނަށާއި އިދިކޮޅު ފަރާތްތަކުގެ ބޭބޭފުޅުންކަމުގައި ވިޔަސް އެ ބޭފުޅުންނަށް ސަރުކާރުގެ ފަރާތްތަކުން ގުޅުއްވައިގެންނަމަވެސް ޕީއެންސިއަށް އެއްބާރުލުން ދޭންޖެހޭނެކަމަށެވެ.
އަދި ފެލިވަރުގެ މުވައްޒަފުން ޕާޓީއާ ގުޅިވަޑައި ނުގަނެފިނަމަ ފިޔަވަޅު އަޅަން ޖެހޭނެކަަމަށާއި އެގޮތަށް ކަންކޮށްގެން ނޫނީ އިންތިހާބު ކާމިޔާބު ކުރުމަށް ދަތިތަކެއް ކުރިމަތިވެދާނެކަމަށް ހަންޓާ އަހުމަދު ވިދާޅުވި އެވެ.
ހަންޓާ އިތުރަށް ވިދާޅުވީ އޭނާ މިނިސްޓަރުގެ އަރިހުންވެސް އެދެނީ ރައީސްއައް ދަންނަވާގެންވެސް ފެލިވަރުގައި މަސައްކަތް ކުރާ މީހުން ކޮންޓްރޯލް ކުރުމުގެ ބާރެއް ހިންނަވަރުގެ ކެންޑިޑޭތަށް ދީގެން ، ވަޒީފާގެ ފުރުސަތު ލިބޭނެކަހަކަލަ ގޮތަކަށް މަގު ފަހިކޮށްދިނުންކަމަށެވެ.
މި ވާހަކަ ދެއްކި ވީޑިއޯކޮޅު ރޭ ވަނީ ސޯޝަލް މީޑިއާގައި ދައުރު ކުރަން ފަށައިފައެވެ. މިއީ ވޯޓަށް ނުފޫޒު ފޯރުވުން ކަމަށް ބުނެ އެތައް ބަޔަކު ކަންބޮޑުވުން ފާޅުކޮށް އީސީ ޓެގްކޮށް ދިޔައީ ޝުއޫރުތައް ފާޅު ކުރަމުންނެވެ. މިކަމާ ގުޅިގެން އާންމުންނާއި އިދިކޮޅު ފަރާތްތަކުގެ ފާޑުކިޔުންވަނީ ހަންޓާ އަހުމަދަށާއި ސަރުކާރަށްވެސް އަމާޒުވެފަ އެވެ.
އެއާއެކު އީސީގެ ރައީސް ފުއާދު ތައުފީގު އެކްސްގައި ވިދާޅުވީ އެ ވީޑިއޯގައި ދައްކާ ވާހަކަ ރަނގަޅު ނޫން ކަމަށެވެ. އެހެންކަމުން އެކަމުގައި ފިޔަވަޅު އެޅުމަށްޓަކައި ނެޝަނަލް ކޮމްޕްލެއިންސް ބިއުރޯއަށް މައްސަލަ ހުށަހެޅުމަށް ފުއާދު އެދިވަޑައިގަތެވެ.
ސަރުކާރުގެ ކެންޑިޑޭޓުންނަށް ވޯޓު ދިނުމަށް މަޖުބޫރުކޮށް ވަޒީފާގެ ބިރު ދައްކާ ކަމަށް އިދިކޮޅު ފަރާތްތަކުން ވެސް އަންނަނީ ބުނަމުންނެވެ. އަދި އިދިކޮޅު ފަރާތްތަކުން އަންނަނީ މަޖިލިހުގެ މެޖޯރިޓީ ސަރުކާރަށް ނުދިނުމަށް ގޮވާލަމުންނެވެ. ނަމަވެސް އިދިކޮޅު ފަރާތްތަކުގެ ތުހުމަތުތައް ސަރުކާރުން ދޮގު ކުރެއެވެ.
