މަޖިލިސް އިންތިހާބާއި ދިމާކޮށް ޕީއެންސީން ކޮންމެ ދުވަހަކު ބާއްވަމުން އަންނަ ނޫސްވެރިންގެ ބައްދަލުވުމުގައި އިންތިހާބުގެ ތަރުޖަމާނު ހިނާ ވަލީދު ވިދާޅުވީ އެމްޑީޕީގެ ޗެއާޕާސަން ފައްޔާޒު އިސްމާއިލް ވާހަކަ ދައްކަވާ ޓޯން އެއްގޮތަކަށްވެސް ޕީއެންސީއަށް ކަމަކު ނުދާކަމަށެވެ. އަދި އެއީ ސިޔާސީ ޕާޓީއެއްގެ އިސް ލީޑަރަކު ވާހަކަ ދައްކަވަން ޖެހޭ ފަދަ ޓޯނެއް ނޫންކަމަށްވެސް ހީނާ ވިދާޅުވިއެވެ.
ނޫސްވެރިންނަށް މައުލޫމާތު ދެއްވަމުން ހީނާ ވަނީ ރައީސް ޔާމީންގެ މައްސަލަ ލަސްވާތީ އެކަން ޖޭއެސްސީއަށް ހުށައެޅުމުން އެވެސް ޖޯކެެއްގެ ގޮތުގައި ސިފަކުރައްވާ ވާހަކަދައްކަވާފައެވެ. ހީނާ ވިދާޅުވީ އެމްޑީޕީގެ މެޖޯރަޓީ އޮތް ޖޭއެސްސީއަށް އެ މައްސަލަ ބަލަން އަސްލަމް ވަޑައިގަތުމަކީ ބޮޑު ޖޯކެއް ކަމަށެވެ.
ރައީސް ޔާމީންގެ ހުކުމް އިއްވަން ޖެހޭ ޝަރީއަތުގެ މަޖިލިސް ނުބާއްވާތީ އެ ޝަރީއަތް ލަސްވާ ސަބަބު ބެލުމަށް ރައްޔިތުން މަޖިލީހުގެ ރައީސް މުހައްމަދު އަސްލަމް އިއްޔެވަނީ ޖުޑީޝަލް ސާރވިސް ކޮމިޝަން ޖޭއެސްސިއަށް ހުށައަޅާފައެވެ. އަސްލަމްގެ ހުށައެޅުމުގައި ބުނެފައިވަނީ "ރައީސް ޔާމީންގެ އިސްތިއުނާފުގެ މައްސަލައިގެ ޝަރީއަތުގެ އަޑުއެހުންތައް ނިމި ހަތަރު މަސް ވީއިރު ވެސް، ހުކުމް ނީއްވި ލަސްވަމުން ދާތީ، މިހެން މިދިމާވަނީ، ފަނޑިޔާރުންގެ މައްޗަށް އެއްވެސް ކަހަލަ ނުފޫޒެއް އޮވެގެން، ނޫނީ ސުލޫކީ މިންގަނޑު ނުހިފެހެއްޓިގެންތޯ ޖޭއެސްސީ އިން ބައްލަވައި ދެއްވުމަށް ހުށަހަޅާކަމަށެވެ.
މި މައްސަލަ ހުށައަޅުއްވާނެކަމަށް އަސްލަމް ވިދާޅުވުމުން ޕީޕީއެމް ޕީއެންސީގެ ލީޑަރުން ގެންދަވަނީ އަސްލަމަށް ރައްދުދެއްވަމުންނެވެ.
