މިއަދު ކުރިއަށްދާ ރައްޔިތުންގެ މަޖިލިހުގެ އިންތިހާބުގައި ވޯޓު ލެއްވުމަށްފަހު ނޫސްވެރިންނާ ބައްދަލުކުރައްވާ ޔާމީން ވިދާޅުވީ، ރައީީސް ސޯލިހާއި ރައީީސް މުއިއްޒުގެ ސަރުކާރުން ވެސް ކަން ކުރަމުން އަންނަނީ އެ ގޮތަށް ކަމަށެވެ.
ނަމަވެސް ވެރިކަމުގައި ހުންނެވިއިރު އިންތިހާބަކާ ދިމާކޮށް ދައުލަތުގެ ވަސީލަތެއް ބޭނުންކޮށްފައި ނުވާނެ ކަމަށް ޔާމީން ވިދާޅުވި އެވެ. އެގޮތުން އިންތިހާބުގެ ކެމްޕެއިނަށް ރަށްރަށަށް ދަތުރުކުރުމުގައި ވެސް ދައުލަތުގެ އެއްވެސް ވަސީލަތެއް ބޭނުން ނުކުރައްވާކަމުގައި ޔާމީން ފާހަގަކުރެއްވި އެވެ.
މީގެއިތުރުން ރައީސް ޔާމީންގެ ސަރުކާރުގައި އިންތިހާބަކާ ދިމާކޮށް ކަޑަޖަހާފައި ނުވާނެ ކަމަށާއި، އެފަދަ ދުވަސްވަރެއްގައި ވަކި މަޝްރޫއުތައް ނިންމަވާނެ ކަމުގެ ވާހަކަތައް ވެސް ނުދައްކަވާ ކަމަށް ޔާމީން ވިދާޅުވި އެވެ.
ޔާމީން އިތުރަށް ވިދާޅުވި ގޮތުގައި މި ސަރުކާރުގެ ފަރާތުން ފެންނަނީ ނިމިދިޔަ އެމްޑީޕީގެ ވެރިކަމުގައި ކޮށްފައިވާ ވައްކަމާ ހިޔާނާތުގެ އިތުރުން ވޯޓު ހޯދަން ކަޑަ ޖެހުން ވެސް އެއަށްވުރެ މާ ފުރިހަމައަށް ކުރަމުންދާ މަންޒަރު ކަމުގަ އެވެ.