ބޮއިޑް ރާއްޖެއަށް ވަޑައިގަނެ، ކުރިއަށް ގެންދިޔަ 10 ދުވަހުގެ ތިމާވެށީގެ ދިރާސާއަކަށްފަހު ނެރުނު ރިޕޯޓުގައި ބޮއިޑް ވިދާޅުވީ ރާއްޖޭގެ ތިމާވެއްޓާއި އިންސާނީ ހައްގުތަކާ އެންމެ ގުޅުންހުރި އެންމެ ހިޔާލު ތަފާތުވާ މައުލޫއަކީ ބިން ހިއްކުން ކަމަށެވެ.
ބޮއިޑް ވަނީ ރާއްޖޭގެ ބައެއް ރަށްރަށުގައި ބިން ބޮޑުކުރުމަށާއި އާ ރަށްތައް އުފެއްދުމަށް މޫދުން ވެލި ނެގުން ފާއިތުވި އަހަރުތަކުގައި ވަރަށް ބޮޑަށް އިތުރުވެފައިވާ ކަމަށް ފާހަގަކޮށްފަ އެވެ. އެގޮތުން ބޯހިޔާވަހިކަމާއި އުމްރާނީ ކުރިއެރުން އަދި ސިނާއަތްތައް ތަރައްގީ ކުރުމަށްޓަކައި އިތުރު ބިން ބޭނުންވާ ކަމަށް އެޑްމިނިސްޓްރޭޝަނުން ބުނާ ކަމަށް ބޮއިޑް ފާހަގަކުރި އެވެ. އަދި ބިން ހިއްކުމަކީ ކަނޑުގެ ލޮނުގަނޑު އުފުލުން ފަދަ މޫސުމީ ބަދަލުތަކާ ފައިހަަމަ ކުރުމަށްޓަކައި ކުރަން ޖެހޭ ކަމެއްކަން މި އެޑްމިނިސްޓްރޭޝަނުން ވިދާޅުވާ ކަމަށް ވެސް ބޮއިޑް ވަނީ ފާހަގަކޮށްފަ އެވެ.
ބޮއިޑް އިތުރަށް ވިދާޅުވެފައި ވަނީ ބިން ހިއްކުމަކީ ކަނޑުގެ ދިރުންތައް ނެތިކޮށްލާ އަދި ގައުމަށް ކޮންމެ އަހަރަކު އެތައް މިލިއަން ފަތުރުވެރިން ޒިޔާރަތްކުރާ ސަބަބު ކަމަށްވާ ތިމާވެއްޓާއި ދިރޭ ތަކެތީގެ ވެށި ހަލާކުކޮށްލާ ކަމެއް ކަމަށެވެ.
މީގެ އިތުރުން ހަގީގީ މާނައިގައި ދެމެހެއްޓެނެވި ގޮތަކަށް އަދި މުޖުތަމައުގެ ބައިވެރިވުމާއި އެހީތެރިކަމާ އެކު ބިން ހިއްކުމުގެ މަސައްކަތް ކުރިއަށް ގެންގޮސްފިނަމަ އެކަން ވެގެން ދާނީ ތިމާވެށީގެ ކުއްލި ހާލަތުން ކުރެވޭ ނެދެވޭ އަސަރުތަކާ ފައިހަަމަކޮށް އެ ކަންކަމުން ދިފާއުވުމަށް ލިބޭ ވަރަށް އަގުހުރި މެދުވެރިއަކަށް ކަމަށް ބޮއިޑް ވަނީ ވިދާޅުވެފަ އެވެ.
ސްޕެޝަލް ރެޕަޓުއަރުންނާއި ވޯކިން ގްރޫޕުތަކަކީ އިންސާނީ ހައްގުތަކާ ބެހޭ ކައުންސިލުގެ ސްޕެޝަލް ޕްރޮސީޖާގެ ބައެކެވެ. އދ. ގެ އިންސާނީ ނިޒާމުގެ ތެރޭގައި މިނިވަން ހަބީރުން އެންމެ ގިނައިން ހިމެނޭ އެންމެ ބޮޑު ގުނަވަން ކަމަށްވާ ސްޕެޝަލް ޕްރޮސީޖާޒްއަކީ އިންސާނީ ހައްގުތަކާ ބެހޭ ކައުންސިލުގައި މިނިވަންކަމާ އެކު ކަންކަން ބަލާ ހޯދާ އަދި މޮނީޓާ ކުރުމަށް ކިޔާ އާންމު ނަމެކެވެ.
