ފަނޑިޔާރުންގެ ޖަމިއްޔާގެ ހާއްސަ ގޮތްޕެއްގެ ގޮތުން "ވިމެންސް ވިންގް" ގެ ނަމުގައި ގޮތްޕެއް ހެދުމަށް ނިންމާފައިވަނީ އަންހެން ފަނޑިޔާރުންގެ ހައްގުގައި ވަކާލާތު ކުރުމަށްޓަކައެވެ.
މި ނިންމުން ނިންމީ، މި ހަފްތާ ތެރޭގައި ކްރޮސްރޯޑުގައި އޮތް އަންހެން ފަނޑިޔާރުންގެ މަހާސިންތާގެ ތެރެއިންނެވެ. މި މަހާސިންތާއަކީ ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އާއި ޖުޑީޝަލް ސާވިސް ކޮމިޝަން (ޖޭއެއްސީ) އިން އިންތިޒާމުކޮށްގެން ބޭއްވި، އަންހެން ފަނޑިޔާރުންގެ ދެވަނަ މަހާސިންތާއެވެ.
މި ކޮންފަރެންސް ހުޅުވުމުގެ ރަސްމިއްޔާތު ޝަރަފު ވެރިކޮށްދެއްވާ ދިވެހިރާއްޖޭގެ އުއްތަމަ ފަނޑިޔާރު އަހްމަދު މުއުތަސިމް އަދުނާން ދެއްކެވި ވާހަކަފުޅުގައި ކޮންފަރެންސްގެ ތެރެއިން އަންހެން ފަނޑިޔާރުންނަށް ޝަރުޢީ ދާއިރާގެ ތެރެއިން ހުރި ގޮންޖެހުންތައް ދެނެގަނެވޭނެ ކަމަށާއި އެ ގޮންޖެހުންތަކުން އަރައިގަތުމަށް ކުރަންޖެހޭ ކަންކަންވެސް ފާހަގަ ވެގެންދާނެކަމަށް ވިދާޅުވިއެވެ.
އެފަދަ ގޮންޖެހުންތަކުން އަރައިގަނެ މިންތީގެ ހަމަހަމަކަމާއެކު މަސައްކަތްކިރާ ޖުޑީޝަރީއަކަށް ހެދުމަށް އެންމެން އެކުގައި މަސައްކަތްކޮށް އެފަދަ އެންމެހައި މަސައްކަތްތައް ކާމިޔާބު ވެގެން ދިޔުމަށް އެމަނިކުފާނު އުންމީދު ކުރައްވާކަމަށްވެސް ވިދާޅުވިއެވެ.
