އައިޖީއެމްއެޗުން މިއަދު ނެރުނު ނޫސް ބަޔާނެއްގައި ބުނީ ބަލި މީހުންނަށް ފަރުވާ ދިނުމުގައި އެ ހޮސްޕިޓަލުން އަމަލު ކުރަނީ މެޑިކަލް ޕްރެކްޓިސްގައި އަމަލު ކުރަމުން އަންނަ އުސޫލުތަކާ އެއްގޮތަށް ކަމަށެވެ. ސޯޝަލް މީޑިއާގައި ބަލިމީހެއްގެ ހާލަތާއި ފަރުވާ އާ ބެހޭ ގޮތުން ވަކި ގޮތަކަށް ވާހަކަ ދެކެވުނު ނަމަވެސް، ބަލިމީހުންގެ ބަލީގެ ހާލަތާއި ދީފައިވާ ފަރުވާގެ ތަފްސީލުތަކަކީ އާންމުކޮށް ސޯޝަލް މީޑިއާގައި އެ ހޮސްޕިޓަލުން އާންމުކުރާނެ ވާހަކަތަކެއް ނޫން ކަމަށް އައިޖީއެމްއެޗުން ބުނެ އެވެ.
އައިޖީއެމްއެޗުން ބުނެފައި ވަނީ ފަރުވާދޭއިރު ހިތްހަމަ ނުޖެހޭ ގޮތަކަށް ނުވަތަ ރަނގަޅުނޫން ގޮތަކަށް ފަރުވާގެ ކަމެއް ކުރިއަށްދާހެން ބަލިމީހަކަށް ނުވަތަ އެހީތެރިންނަށް ހީވާ ނަމަ ނުވަތަ އެފަދަ ކަމެއް ފާހަގަކުރެވޭ ނަމަ އެ ކަންކަން އިތުރަށް ސާފުކޮށް، އޮޅުންފިލުވޭނެ އިންތިޒާމުތަކާ އަދި އެއަށްފަހު ވެސް މައްސަލައެއް އޮތް ނަމަ އެ މައްސަލައެއް ހޮސްޕިޓަލުގެ ކަމާ ބެހޭ ފަރާތްތަކަށް ވަގުތުން ވަގުތަށް ހުށަހެޅޭނެ އިންތިޒާމުތައް ވެސް ހަމަޖެހިފައިވާ ކަމަށެވެ.
ހިތްހަމަނުޖެހޭ ހާލަތެއް ދިމާވުމުން މިއިން މަގެއް ހިޔާރުކުރުމުގެ ބަދަލުގައި ސޯޝަލް މީޑިއާގައި، ކަމުގެ ހަގީގަތް އޮޅޭ ގޮތަށް އެ ހާދިސާއަކާ ގުޅުވައި އެ ހޮސްޕިޓަލުގައި ރައްޔިތުންނަށް ހިދުމަތް ދިނުމުގައި މަސައްކަތް ކުރައްވަމުން ގެންދަވާ ޑޮކްޓަރުންގެ ފޮޓޯ އާންމުކޮށް، އެ ފަރާތްތަކުގެ ޒިންމާ އަދާކުރުމަށް ހުރަސް އެޅޭ ފަދަ އަމަލުތައް އައިޖީއެމްއެޗުން ވަނީ ހަރުކަށި އިބާރާތުން ކުށްވެރިކޮށްފަ އެވެ.
އެފަދަ އަމަލުތަކާ ގުޅިގެން އެ ހޮސްޕިޓަލުން އަޅަން ޖެހޭ ފިޔަވަޅުތައް އަޅާނެ ކަމަށް ވެސް އައިޖީއެމްއެޗުން ނެރުނު ބަޔާނުގައި ވަނީ ބުނެފަ އެވެ.
