2004 ވަނަ އަހަރުގެ ފަހުން ފުރަތަމަ ފަހަރަށް އާސެނަލްއަށް ލީގު ޗެމްޕިއަންކަން ހޯދުމާ ވަރަށް ގާތަށް ދެވިފައިވާއިރު، މި ވަގުތު ލީގުގެ ތާވަލުގެ އެއް ވަނައިގައި އާސެނަލް އޮތީ ދެ ވަނައިގައި އޮތް ސިޓީ އަށް ވުރެ އިތުރަށް މެޗެއް ކުޅެ، އެއް ޕޮއިންޓްގެ ފަރަގަކާއެކުއެވެ.
އާސެނަލަށް 36 މެޗުން 83 ޕޮއިންޓް ލިބިފައިވާއިރު، ސިޓީ އަށް 35 މެޗުން ވަނީ 82 ޕޮއިންޓް ލިބިފަ އެވެ. އެހެންކަމުން، ސިޓީއަށް އަމިއްލަ ބާރުގައި ލީގު ހޯދުމުގެ ފުރުސަތު އެބައޮތެވެ. އާސެނަލްއަށް އޮތީ ސިޓީން ޕޮއިންޓެއް ގެއްލުވާލާތޯ އުއްމީދު ކުރުމާއެކު ބާކީ އޮތް ދެ މެޗު ނެގުމެވެ. އެއީ ޔުނައިޓެޑު މެޗާ، އެވަޓަން މެޗެވެ.
އާޓެޓާ ބުނީ އޭނާގެ ބޮލުގައި އޮތީ ހަމަ އެކަނި ލީގު ނެގުން ކަމަށެވެ. އެ ނޫން އެހެން އެއްވެސް ވިސްނުމެއް ނެތް ކަމަށް، އޯލްޑްޓްރެފަޑްގައި ޔުނައިޓެޑާ ދެކޮޅަށް ކުޅޭ މެޗާ ބެހޭ ގޮތުން ވާހަކަ ދައްކަމުން އާޓެޓާ ބުންޏެވެ.
"އަހަރެންގެ ބޮލުގައި އިން ހަމަ އެކަނި އެއްޗަކީ ޕްރިމިއާ ލީގުގެ ޗެމްޕިއަންކަން. އެނޫން އެހެން އެއްވެސް ވިސްނުމެއް ނެތް"
