ރާއްޖޭގައި ތިބި އިންޑިއާގެ ސިފައިން އަނބުރާ އެ ގައުމަށް ފޮނުވާލާފައިވާކަން ރަސްމީކޮށް ހާމަކުރުމަށް މިއަދު ރައީސް އޮފީހުގަައި ބޭއްވި ނޫސްވެރިން ބައްދަލުވުމުގައި ގައްސާން ވިދާޅުވީ ސެނެހިޔާއަށް އައިސް ތިބި ޑޮކްޓަރުންނަކީ 2012 ވަނަ އަހަރުގެ ސެޕްޓެމްބަރު މަހުގެ ތެރޭގައި ޑިފެންސް މިނިސްޓްރީން އެދިގެން އިންޑިއާ ސަރުކާރުން ފޮނުވާފައި ތިބި ޑޮކްޓަރުން ކަމަށެވެ.
ގައްސާން ވިދާޅުވެފައި ވަނީ އެގޮތަށް އަންނަ މީހުންނަކީ ރިކުއަމެންޓް އޮތް ގޮތަކުން އެދިގެން އަންނަ މީހުން ކަމަށެވެ. އެ މީހުންނަކީ އެއްވެސް އަސްކަރީ ރޯލެއް އޮންނަ ބައެއް ނޫން ކަމަށް ވެސް މިނިސްޓަރު ވިދާޅުވި އެވެ.
ސެނެހިޔާގައި ތިބި ޑޮކްޓަރުންނާ ގުޅޭގޮތުން މި ބައްދަލުވުމުގައި ފޮރިން މިނިސްޓަރު މޫސާ ޒަމީރު ވިދާޅުވި ގޮތުގައި ރައީސް ޑރ. މުހައްމަދު މުއިއްޒުގެ ވިސްނުންފުޅަކީ އެމީހުންގެ ފަރާތުން ރާއްޖޭގެ މިނިވަންކަމާއި އިސްތިގުލާލަށް ގެއްލުންވާފަދަ ކަމެއް ދިމާވެއްޖެނަމަ ނުވަތަ އެމީހުންގެ ބޭނުންކުރަން ނުޖެހޭ ހާލަތެއް އައިސްފިނަމަ އިންޑިއާ ސަރުކާރުގައި އެދިގެން އެމީހުން އަނބުރާ ފޮނުވާލުން ކަމުގަ އެވެ. އެހެންނަމަވެސް މިވަގުތަށް އެމީހުން ގެންދިއުމުގެ ބޭނުމެއް އޮތް ކަމަށް ސަރުކާރުން ނުދެކޭ ކަމަށް ޒަމީރު ވިދާޅުވި އެވެ.
ޒަމީރު ވިދާޅުވީ ސަރުކާރާ ހަވާލުވިއިރު ސ. ގަމާއި ހދ. ހަނިމާދޫ އަދި ލ. ކައްދޫގައި ތިބި 76 ސިފައިން އަނބުރާ އިންޑިއާއަށް ފޮނުވާލެވިފައިވާ ކަމަށެވެ.
