ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓްރީން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޗީފް ޕްރިންސިޕަލް އިމިގްރޭޝަން އޮފިސަރު ފާތިމަތު ލަތީފާ ވިދާޅުވީ ސްކޫލް ޗުއްޓީ އާ ގުޅިގެން ރާއްޖޭން ބޭރަށް ދަތުރުކުރާ ފަރާތްތަކުގެ އަދަދު އިތުރުވެ، ގިނަ އަދަދެއްގެ ބަޔަކު ޕާސްޕޯޓު ހެދުމަށް އެދެމުންދާ ކަމަށެވެ.
މާލެ އާއި ރާއްޖޭގެ އެކި ސަރަހައްދުތަކުގައި ހުރި އިމިގްރޭޝަންގެ އޮފީސްތަކުން ވޭތުވެދިޔަ ހަފުތާއެއްހާ ދުވަހުގެ ތެރޭގައި 2،581 މީހަކަށް ޕާސްޕޯޓު ދޫކުރެވިފައިވާ ކަމަށް ލަތީފާ ވިދާޅުވި އެވެ.
ލަތީފާ ވަނީ ޕާސްޕޯޓު ހެދުމަށް އެދި ހުށަހަޅާއިރު، ފުރިހަމަ ކުރަން ޖެހޭ ލިޔެކިޔުންތައް ފުރިހަމަ ކުރުމަށްފަހު ހުށަހެޅުމުން ޕާސްޕޯޓު ލިބުން އަވަސް ވާނެ ކަމަށް ފާހަގަކުރައްވާފަ އެވެ.
މި ދުވަސްވަރު ގިނަ އަދަދެއްގެ ފަރާތްތަކުން ޕާސްޕޯޓު ހޯދުމަށް އެދެމުން އަންނައިރު، އިމިގްރޭޝަނުން ދަނީ ޕާސްޕޯޓު ހެދުމުގެ ކަންކަން ލުއި ފަސޭހަކޮށްދިނުމުގެ މަސައްކަތް ކުރަމުންނެވެ.
