އެލްޖީއޭގެ ޑިރެކްޓާ ޖެނަރަލް އާދަމް ޝަރީފް ސޮއިކުރައްވާ އެލްޖީއޭއިން ފިނޭންސް މިނިސްޓަރު ޑރ. މުހައްމަދު ޝަފީގަށް ފޮނުއްވި ސިޓީއެއްގައި ވަނީ ކައުންސިލްތަކަށް މަހުން މަހަށް ޖަމާވާ ބްލޮކް ގްރާންޓް ޖަމާވުން ލަސްވާތީ ކައުންސިލްތަކުން ކަންބޮޑުވުންފާޅު ކުރަމުންދާ ކަމަށެވެ.
ކައުންސިލްތަކުން މަހުން މަހަށް ދޭންޖެހޭ މުސާރަ އަދި އެހެނިހެން ހަރަދުތައް ހަމަޖައްސަނީ ބްލޮކް ގްރާންޓުގެ ތެރެއިން ކަމަށާއި ބްލޮކް ގްރާންޓު ޖަމާވުން ލަސްވަމުންދާނަމަ އެކަންކަމުގައި ހުރަސްތަކެއް ކުރިމަތިވަމުން އަންނަކަމަށްވެސް އެލްޖީއޭގެ ސިޓީގައި ބުނެފައިވެއެވެ.
ބްލޮކް ގްރާންޓު އަވަހަށް ޖަމާކޮށް ދިނުމަށް އެލްޖީއޭއިން ވަނީ އެދިފައެވެ. އަދި މި ފައިސާ އެއްވެސް ސަބަބަކާ ހުރެ ހިފަހައްޓާނަމަ، އެސަބަބެއް އެ އިދާރާއަށާއި އެ ކައުންސިލަކަށް އެނގޭނެ އިންތިޒާމުތައް ހަމަޖައްސާދިނުމަށްވެސް އެލްޖީއޭއިން ފިނޭންސަށް ފޮނުވި ސިޓީގައި އެދިފައިވެއެވެ.
ދައުލަތުގެ ބަޖެޓުން ކައުންސިލްތަކަށް ބްލޮކް ގްރާންޓްގެ ގޮތުގައި ފައިސާ ޖަމާކުރަން ނިންމީ މިދިޔަ ސަރުކާރުގައެވެ. އަދި މި ފައިސާ ދޭން ފަށާފައިވަނީ 2020 ވަނަ އަހަރުއެވެ.
