59 އަހަރުގެ ފީޗޯއަށް ހަމަލާދީފައިވަނީ ސްލޮވާކިޔާގެ މެދުތެރޭގައި އޮންނަ ބަންސްކާ ބިސްޓްރީޗާ ސަރަހައްދުގެ ރަށެއް ކަމުގައިވާ ހަންޑްލޮވާގައި ސަރުކާރުގެ އިސްވެރިންނާއެކު ބޭއްވެވި ނިމުނު ވަގުތާ ދިމާކޮށެވެ. ހަމަލާ ދިނުމާއެކު, ފީޗޯއަށް ފަރުވާ ދިނުމަށް ހެލިކޮޕްޓަރުގައި ބަންސްކާ ބިސްޓްރީޗާގެ ވެރިރަށުގައި ހުރި ހަސްފަތާލަކަށް ގެންގޮސްފައިވެ އެވެ.
ފީޗޯއަށް ބަޑިން ޙަމަލާ ދީފައިވަނީ ބައްދަލުވުން ނިމުމުން, ބައްދަލުވުން އޮތް އިމާރާތުން ބޭރަށް ނުކުމެވަޑައިގަންނަވައި, އެ ސަރަޙައްދަށް އެއްވެ ތިބި ޢާންމުންނާ ސަލާމް ކުރައްވަން އުޅުއްވި ވަގުތުގަ އެވެ. ފުލުހުން ވަނީ ފީޗޯއަށް ހަމަލާ ދިން މީހާ ވަގުތުން ހައްޔަރުކޮށްފަ އެވެ.
ސްލޮވާކިއާ ބޮޑުވަޒީރުގެ ނައިބު ތޯމަސް ޓަރަބާ "ބީބީސީ" އަށް ދިން އިންޓަވިއުއެއްގައި ވިދާޅުވީ ފީކޯގެ އޮޕަރޭޝަން ކާމިޔާބު ކަމަށާއި، ފުރާނަ ސަލާމަތްވާނެ ކަމަށް އުންމީދު ކުރެވޭ ކަމަށެވެ.
އެ ގައުމުގެ މީޑިއާތަކާ ހަވާލާދީ ބޭރު މީޑިއާތަކުން ބުނެފައިވަނީ ހަމަލާދީފައިވަނީ 71 އަހަރުގެ މީހެއް ކަމަށާއި އޭނާއަކީ ލިޔުންތެރިއެއް އަދި ސިޔާސީ އެކްޓިވިސްޓެއް ކަމަށެވެ.
ހަމަލާދިން ސަރަހައްދުން ލިޔުންތެރިޔާ ވަގުތުން ހައްޔަރުކޮށްފައިވާއިރު، ހަމަލާދިން ސަބަބު ދެނެގަތުމަށް ސީރިއަސް ތަހުގީގެއް ވަނީ ފަށާފަ އެވެ.
ސްލޮވާކިއާގެ ބޮޑުވަޒީރު ފިކޯގެ ފުރާނައަށް މިވަގުތު ނުރައްކަލެއް ނެތް ކަމަށް އޭނާގެ ނައިބު ވަނީ ވިދާޅުވެފައި. --ފޮޓޯ: އޭއެފްޕީ
މިއީ ފީކޯ ބޮޑުވަޒީރުގެ މަގާމު އަދާ ކުރައްވާ ތިން ވަނަ ދައުރެވެ. އެންމެ ފަހުން އޭނާ އިންތިހާބުވީ ސެޕްޓެމްބަރު، 2023، ގައި ބޭއްވި އިންތިހާބު ކާމިޔާބުކޮށްގެންނެވެ.
މި ފަހަރު ވެރިކަމަށް ވަޑައިގެން، ފިކޯ ވަނީ ޔޫކްރެއިން-ރަޝިއާ ހަނގުރާމައިގައި ރަޝިއާ އަށް ތާއީދުކޮށް ވާހަކަ ދައްކަވައިފަ އެވެ. ފިކޯ ވަނީ ޔޫކްރެއިނަށް ހަތިޔާރު ވިއްކުން ހުއްޓާލައްވައި، ޔޫކްރެއިންގެ މިނިވަންކަމާ މެދު ސުވާލު އުފައްދަވައިފަ އެވެ.
