ޕީއެސްއެމްގެ ރާއްޖެ މިއަދު ޕްރޮކްރާމްގައި ރޭ ވާހަކަފުޅު ދައްކަވަމުން ސްޓޭޓް މިނިސްޓަރު ސިއްދީގު ވިދާޅުވީ ބިމާއި ބެހޭ ބިލު ފާސްކުރީ ދިރާސާނުކޮށް ރައްޔިތުންގެ މަޝްވަރާ އަކާއިނުލާ ކަމަށެވެ.
މި ބިލު މަޖިލީހުން ފާސްކުރީ މިދިޔަ މަހުގެ 29 ގައި ބޭއްވި މަޖިލިސް ޖަލްސާގަ އެވެ.
ބިމާބެހޭ ޤާނޫނަށް އެ އިސްލާހު ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލު އަހުމަދު ނަސީމެވެ. މި އިސްލާހު ރައްޔިތުންގެ މަޖިލީހުން ފާސްކޮށްފައިވަނީ ވޯޓުގައި ބައިވެރިވި 35 މެންބަރުންގެ ވޯޓުންނެވެ.
ގޯތި ލިބިފައިވާ ފަރާތްތަކަށް ތިން މަސްދުވަހުގެ ތެރޭގައި ގޯތިތައް ހަވާލު ކުރަންޖެހޭ ގޮތަށް ދިވެހިރާއްޖޭގެ ބިމާބެހޭ ގާނޫނަށް ގެނައި އިސްލާހު ބިލު ރައީސް ޑރ. މުހައްމަދު މުއިއްޒު އަނބުރާ މަޖިލީހަށް އިއްޔެ ވަނީ ފޮނުއްވައިފަ އެވެ.
ރައީސް އޮފީހުން ބުނީ ބިމާ ބެހޭ ގާނޫނަށް ނުވަ ވަނަ އިސްލާހު ގެނައުމުގެ ބިލާ މެދު އަލުން ވިސްނާވަޑައިގަތުމަށް، ގާނޫނުއަސާސީގައި ބަޔާންކޮށްފައިވާ ގޮތުގެ މަތިން ރައްޔިތުންގެ މަޖިލީހުގައި ރައީސް އެދިވަޑައިގެން، އެ މި ބިލު ތަސްތީގުނުކުރައްވައި އަނބުރާ މަޖިލީހަށް ފޮނުއްވާފައިވާ ކަމަށެވެ.
ސިއްދީގު ވިދާޅުވީ، ރައީސް މި ބިލު ތަސްދީގު ނުކުރައްވާ މަޖިލީހަށް ފޮނުވާލެއްވީ، ބިލުގައި ހުރި މާއްދާތަކާމެދު މަޖިލީހުން އަލުން ވިސްނެވުމަށް ކަމަށާއި ކުރީގެ ސަރުކާރު ނިމި އަދި މަޖިލީހުގެ ދައުރު ނިމެން ކައިރިވެފައި ވަނިކޮށް އެފަދަ ބިލެއް ފާސްކުރުމުގައި އާ ސަރުކާރުގެ ސިޔާސަތުތައް ތަންފީޒުކުރުމަށް ހުރަސްއެޅުމުގެ ސިޔާސީ ވިސްނުންތަކެއް ހުރެގެންކަން ފާހަގަކުރެވޭކަމަށެވެ. އަދި 5 އަހަރުގެ ދައުރެއް ނިމިގެންދިޔައިރު، އެ މަސައްކަތް ދައުރުގެ އެންމެ ފަހަށް ބޭއްވުމުން އެކަން ދޭހަވާކަމަށެވެ.
ސަރުކާރުން ބިންތައް ހިއްކަން މަސައްކަތް ކުރާ މި ދަނޑިވަޅުގައި، ތިން މަސްދުވަސްތެރޭ ގޯތި ދޫކުރަން ލާޒިމް ކުރާ ބިލެއް ތަންފީޒު ކުރުމަކީ ކުޅަދާނަ ކަމެއް ނޫންކަމަށް ސިއްދީގު ވިދާޅުވި އެވެ.
ސިއްދީގު ވިދާޅުވީ، ހުށައެޅި އިސްލާހުތަކަށް އެކަށީގެންވާ މިންވަރެއްގައި މަޖިލީހުގައި މަޝްވަރާ ކޮށްފައި ނުވާއިރު، ބިލް ފާސްކުރީ ރައްޔިތުންގެ ހިޔާލުވެސް އެކަށީގެންވާ ގޮތުގައި ނުހޯދާކަމަށެވެ.
މިދިޔަ ސަރުކާރުގެ ގެދޮރުވެރިޔާ ސްކީމުގެ ދަށުން ވަނީ ގިރަވަރު ފަޅާއި ގުޅީފަޅުން ވެސް މާލޭ ރައްޔިތުންނަށް ގޯތި ދޫކޮށްފަ އެވެ.
އާ ސަރުކާރުގެ ވިސްނުމަކީ ބިމާއި ގޯތި ދިނުމާއި ގުޅޭގޮތުން ހުރި ބޮޑެތި މައްސަލަތައް ހައްލުކޮށް، މުޅިން އާ ގާނުނެއް އެކުލަވާލުމެވެ. ހަފްތާ 14ގައި ހިމަނައިގެން ސަރުން އިސްކަންދީ ހުށައެޅި 9 ބިލުގެ ތެރޭގައި "ބިމާބެހޭ ބިލު" އަދި "އިޖުތިމާއީ ބޯހިޔާވަހިކަމުގެ ބިލު" ވަނީ ހުށައަޅާފަ އެވެ.
