ތައިލޭންޑުގެ ބެންކޮކްގައި ކުރިއަށްދާ 18 ވަނަ އިންފޯފިޝް ވޯލްޑް ޓޫނާ ކޮންފަރެންސް އެންޑް އެގްޒިބިޝަންގައި ވާހަކަ ދައްކަވަމުން ޝަމާހް ވިދާޅުވީ މިފްކޯއިން ކޭނަރީ އާއި މަސް ރައްކާކުރާ ވަސީލަތްތަކާއި މަސްކިރާ ބޯޓުފަހަރުތަކަށް ވެސް އިންވެސްޓް ކުރުމަށް އިންވެސްޓަރުންނަށް މަރުހަބާ ކިޔާނެ ކަމަށެވެ.

ޝަމާހް ވިދާޅުވެފައި ވަނީ ދެމެހެއްޓެނިވި ކަނޑުގެ އިގުތިސޯދެއް ގާއިމުކުރުމުގައި މުހިންމު ދައުރެއް އަދާކުރާ ބަޔަކަށްވާއިރު، ކަނޑުގެ ދިރުންތައް ހިމާޔަތްކޮށް، ފާގަތި މުސްތަގުބަލެއް ރާއްޖެއަށް ބިނާކޮށްދޭނެ ބައިވެރިއެއްގެ ގޮތުގައި މިފްކޯ އޮންނާނެ ކަމަށެވެ.

ދެމެހެއްޓެނިވި ގޮތުގައި ކުރާ މަސްވެރިކަމުގެ އިތުރުން މިފްކޯއިން ކަނޑުމަހުގެ އުފެއްދުންތައް ތައްޔާރު ކުރަނީ އެގޮތަށް ބަލައިގެންކަން ފާހަގަކުރައްވާ ޝަމާހް ވިދާޅުވި ގޮތުގައި ކޮލިޓީގެ އެންމެ އުސްފަންތީގައި ދެމި ތިބުމަށާއި އިސްރާފު ކުޑަ ކުރުމަށް ކުރަން ޖެހޭ ކަންކަން ބަލައި، ދިރާސާކޮށް، ޓެކްނޮލޮޖީއަށް އިންވެސްޓް ކުރުމުގެ މަސައްކަތް އެ ކުންފުނިން ކުރިއަށް ގެންދާ ކަމުގަ އެވެ. އެގޮތުން މިފްކޯގެ ކަނޑުމަހުގެ އުފެއްދުންތަކަކީ ބައިނަލްއަގުވާމީ ފެންވަރުގައި ފާހަގަކޮށްލެވޭ ސެޓްފިކެޓްތަކާ އެކު އުފައްދާ އުފެއްދުންތަކެއްކަން އޭނާ ފާހަގަކުރެއްވި އެވެ.

ޝަމާހް ވިދާޅުވީ ރާއްޖޭގެ މަސްވެރިކަމުގެ އަސާސަކީ ދޮށީގެ މަސްވެރިކަން ކަމަށާއި ބާނާ މަހުގެ އުފެއްދުންތައް ދުނިޔޭގެ ބާޒާރުގައި އެންމެ ކޮލިޓީ ގޮތުގައި ބަލައިންގަންނަ ކަމަށެވެ. ހަމަ އެއާއެކު ބައިކެޗް އުފެދުނަ ނުދީ، ކަނޑުގެ ދިރުންތަަކަށް އެންމެ ގެއްލުން ކުޑަ މަސްވެރިކަމަކީ އެއީ ކަމަށް ވެސް ޝަމާހް ވިދާޅުވި އެވެ. ޝަމާހް ވިދާޅުވެފައި ވަނީ މަސްވެރިންނަށް ހެޔޮ ގޮތް ހޯދައިދިނުމަކީ މިފްކޯގެ އަމާޒު ކަމަށެވެ.