މޫސުން ވަރަށް ގޯސްވެ މާލޭ ސަރަހައްދު ހިމެނޭ ގޮތަށް މެދު ރާއްޖެެތެރެއަށް މޫސުމާއި ބެހޭ އިދާރާއިން ވަނީ އޮރެންޖެ އެލާޓް ނެރެފައެވެ. ބ. އަތޮޅުން ފެށިގެން ވ. އަތޮޅަށް އޮރެންޖު އެލާޓް ނެރެފައިވަނީ މިއަދު ހެނދުނު 9:00 އިން 12:00 އެވެ.
މެޓް އޮފީހުން ބުނީ ވެލާނާ އެއާޕޯޓް ހިމެނޭ ސަރަހައްދަށް ވަރަށް މޫސުން ގޯސްކަމަށެވެ. އެގޮތުން ބޯކޮށް ވާރޭވެހި ގަޑިއަކު 34 މޭލާއި 40 މޭލުގެ ބާރުމިނުގައި ވައި ޖެހޭނެ ކަމަށެވެ. އަދި ވިލާގަނޑުގައި ގަޑިއަކު 60 މޭލަށް ވައި ޖެހޭނެ ކަމަށް ލަފާކުރެވޭކަމަށާއި ކަނޑުތައް ވަރަށް ގަދަވާނެ ކަމަށް ލަފާކުރެވޭކަމަށްވެސް މެޓް އޮފީހުން ވަނީ ބުނެއެވެ.
އެމްއޭސީއެލުން ބުނީ މޫސުމާއި ބެހޭ ގައުމީ އިދާރާއިން މި ސަރަހައްދަށް އޮރެންޖެ އެލާޓް ނެރެފައިވާތީ ފްލައިޓްތަކުގެ ދަތުރުތަކަށް ބްރޫއަރާ ވަގުތަކަށް ބަދަލު އަތުވެދާނެކަމަށެވެ. އެހެންކަމުން އެއާޕޯޓަށް ދިއުމުގެ ކުރިން ފްލައިޓްގެ ގަޑިއަށްް އެއްވެސް ބަދަލެއް އައިސްފައި ވޭތޯ ބެލުމަށް އެމްއޭސީއެލުން އިލްތިމާސްކުރެއެވެ.
މި ދުވަސްވަރު މޫސުން ގޯސްވެ ކަނޑުތައް ގަދަވާނެތީ ރޭގަނޑު ދަތުރުނުކުރުމަށް އެމްއެންޑީއެފުންވެސް ވަނީ އިލްތިމާސްކޮށްފައެވެ. އަދި ވައި ބާރުވެ ގަސްތައް ވެއްޓި ބައެއް ހާދިސާތައް އަންނަނީ ހިނގަމުންނެވެ.
