ކޮންގްރެސްގެ މި ނިންމުން އައީ އެ ޕާޓީގެ ޕީޖީ ގުރޫޕްގެ މެންބަރުންނާ އެކު ރައީސުލްޖުމްހޫރިއްޔާ / ކޮންގްރެސްގެ ރައީސް ޑރ. މުހައްމަދު މުއިއްޒު މިއަދު ބޭއްވި ބައްދަލްކުރެއްވުމު ގަ އެވެ. މުލިއާ ގޭގައި ކުރިއަށްދިޔަ މި ބައްދަލްވުމުގައި އެ ގޮތަށް ނިންމެވީ ސީދާ ރައީސް މުއިއްޒުގެ އެދިލެއްވުމަށެވެ.
އަބްދުއްރަހީމަކީ ރައީސް މުއިއްޒުގެ އިސް އެޑްވައިޒަރެވެ. މަޖިލީހުގެ ދައުރު ފެށުމާ އެކު އެ މަގާމުން ވަކިވެވަޑައިގަންނަވާނެ އެވެ. އަބްދުއްރަހީމް ވަނީ މީގެ ކުރީން ފޮނަދޫ ދާއިރާގެ މެންބަރު ކަމުގެ މަގާމު ދެ ފަހަރެއްގެ މަތީން ފުރުއްވާފަ އެވެ. އެއީ 17 އަދި 18 ވަނަ މަޖިލީހު ގަ އެވެ.
ނައިބަކަށް ގެންނަން ހަމަޖެއްސެވި ނާޒިމަކީ ވެސް ކުރީން ދިއްގަރު ދާއިރާގެ މެންބަރު ކަން ކުރައްވާފަައިވާ ބޭފުޅެކެވެ. މަޖިލީހުގެ ނާއިބު ރައީސް ކަން ވެސް ކުރައްވާފައިވެ އެވެ.
ނައިބު ރައީސް "އެކްސް" ގައި ކުރެއްވި ޕޯސްޓެއްގައި ވިދާޅުވީ އަބްދުއްރަހީމާއި ނާޒިމްގެ ރިޔާސަތުގައި މަޖިލީހުގެ އާ ދައުރަކީ، ދިވެހީންނަށް ނަފާވެރި، ކާމިޔާބު ދައުރަކަށް ވެގެންދާނެ ކަމާއިމެދު ޝައްކު ނުކުރައްވާ ކަމަށެވެ.
20 ވަނަ މަޖިލީހުގައި ޕީއެންސީ ތަމްސީލުކުރާ މެންބަރުންގެ އަދަދު 74އަށް އަރާނެއެވެ. އެއީ މަޖިލިސް އިންތިޚާބަށް ފަހު ޕީއެންސީއާ ގުޅިވަޑައިގަތް ހަތް މެންބަރުން ވެސް ލައިގެންނެވެ.
ވިހިވަނަ މަޖިލީސް ހުވާކުރުން އަންނަ އަންގާރަ ދުވަހު އޮންނާނެއެވެ. ހުވާ ކުރުމަށް ފަހު، ބާއްވާ އެންމެ ފުރަތަމަ ޖަލްސާގައި އޮންނާނީ ރައްޔިތުންގެ މަޖިލީހުގެ ރައީސާއި ނައިބު ރައީސް އިންތިޚާބުކުރަން ސިއްރު ވޯޓެއް ނެގުމެވެ.
