އެންޓީގާ އެންޑް ބާބިޔުޑާގައި ބޭއްވި ސިޑްސް ގްލޯބަލް ބިޒްނަސް ނެޓްވޯކް ފޯރަމް 2024 ގެ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުގެ ވިސްނުމަކީ އަންހެން ވިޔަފާރިވެރިންނަށް 6.5 މިލިއަން ޑޮލަރުގެ ލޯނު ފެސިލިޓީއެއް ތައާރަފްކޮށް، މި ފެސިލިޓީގެ ތެރޭގައި ނުކުޅެދުންތެރިކަން ހުންނަ އަންހެނުންނަށް 25 އިންސައްތަ ކަނޑައަޅާނެކަން ހާމަކޮށްދެއްވާފަ އެވެ.
އަންހެނުން ބާރުވެރިކުރުވުމަށް ސަރުކާރުން ކުރާމަސައްކަތްތަކޭ އެއްގޮތަށް ރައްޔިތުންގެ މެދުގައި ތަފާތުކުރުމެއްނެތި، އެންމެން ޝާމިލުކޮށް ރައްޔިތުން ބާރުވެރިކުރުވުމަށް އިސްކަން ދިނުމުގެ މައްޗަށްވެސް ވާހަކަފުޅު ދެއްކާފައެވެ. އެގޮތުން އެންމެ ކުދި، ކުދި، އަދި މެދުފަންތީގެ ވިޔަފާރިތަކާއި، ޒުވާން ވިޔަފާރިވެރިން ކުރިއަރުވައި، އިންވެސްޓްމަންޓްތަކަށް މަގުފަހި ކޮށްދޭން ޖެހޭކަން ރައީސް ފާހަގަކުރެއްވި އެވެ.
ރައީސް އެންޓީގާ އެންޑް ބާބިޔުޑާއަށް ކުރެއްވި ދަތުރުފުޅުގައި ބައެއް ގައުމުތަކުގެ ވެރިންނާއި އިސް ފަރާތްތަކާއި ބައިނަލްއަގްވާމީ ޖަމުއިއްޔާ ބައްދަލުކުރައްވައި ރާއްޖެއާ އެފަރާތްތަކާ ދެމެދު ގުޅުންބަދަހިކޮށް އެއްބާރުލުން އިތުރުކުރުމާ ގުޅޭގޮތުން މަޝްވަރާކުރައްވާފައިވެ އެވެ.
ބޭރު ގައުމުތަކަށް ރައީސް ކުރައްވާ ރަސްމީ ދަތުރުފުޅުތަކުގައި، ރައްޔިތުން ބާރުވެރިކުރުވުމާ ފުދުންތެެރިކަން އިތުރުކުރުމަށް މަގު ފަހިވާނެ ފުރުސަތުތައް ފަހިކުރެއްވުމަށް ދަނީ ހާއްސަ އިސްކަމެއް ދެއްވައިގެން މަސައްކަތްކުރައްވަމުންނެވެ.
