އެޗްޑީސީން ކުރި އިއުލާނެއްގައި ބުނީ ދެވަނަ ފިޔަވަހި ގައި ގާއިމުކުރެވިފައިވާ ވިނަރެސް ޓަވަރުތަކުގައި ވަކިވަކި ޔުނިޓުތަކުން ގަސްމުށި، ފައިވާން، ބޫޓު، ފަރުނީޗަރު އަދި މި ނޫންވެސް މިފަދަ ހިފާ ގެންގުޅޭ ތަކެތީގެ އިތުރުން ކުނީގެ ބާވަތްތައް ޔުނިޓުން ބޭރު އާންމު ސަރަހައްދުތަކުގައި ބަހައްޓާފައި ހުރުމުގެ ސަބަބުން އިމާރާތުގެ ސަލާމަތާއި ރައްކާތެރިކަން ބެލެހެއްޓުމަށާއި އިމާރާތުގެ އާންމު ބައިތައް ސާފުކުރުމާ އަދި އެހެނިހެން ހިދުމަތްތައް ފޯރުކޮށްދިނުމުގައި އެ ކޯޕަރޭޝަނަށް ދަތިތަކާ ކުރިމަތިވަމުން އަންނަ ކަމަށެވެ.
ވިނަރެސްއަކީ ވަކިވަކި ޔުނިޓުތަކެއްގައި ތަފާތު ގޭބީސީތަކެއް ދިރިއުޅެމުންދާ އިމާރާތެއްކަމުން އެއް ފްލެޓުން ކުރާ ކަމެއްގެ ސަބަބުން އަނެއް އަވަށްޓެރި ފްލެޓަށް އުދަނގޫވުމަކީ އެކަށީގެންވާ ކަމެއް ކަމަށް އެޗްޑީސީން ބުނެ އެވެ. އެޗްޑީސީން ބުނެފައި ވަނީ އިމާރާތުގެ އާންމު ބައިތައް ހަމަހަމަ އުސޫލެއްގެ ދަށުން ބޭނުން ކުރެވުމަކީ އިމާރާތުގައި ހިތްގައިމު އަދި ރައްކާތެރި މާހައުލެއް ބިނާކުރުމަށް ވަރަށް މުހިންމު ކަމެއް ކަމަށެވެ.
އެޗްޑީސީން ވަނީ ވިނަރެސް ފްލެޓުތަކުގެ އާންމު ސަރަހައްދުތަކުގައި އެއްވެސް ފަރާތެއްގެ އެއްޗެއް ބަހައްޓާފައި ހުރި ނަމަ އަންނަ މަހުގެ ނުވަ ވަނަ ދުވަހުގެ ކުރިން އެއެއްޗެއް ނެގުމަށް އަންގާފަ އެވެ. އެ ތާރީހުގެ ފަހުން އެފަދަ ސަރަހައްދުތަކުގައި ބަހައްޓާފައި ހުންނަ ތަކެއްޗާ މެދު ކަނޑައެޅިފައިވާ އުސޫލުގެ ދަށުން ފިޔަވަޅު އަޅާނެ ކަމަށް އެ ކޯޕަރޭޝަނުން ބުނެ އެވެ. އެޗްޑީސީން ބުނި ގޮތުގައި މިކަމުގެ ސަބަބުން އެއްވެސް ފަރާތަކަށް ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުނަގާނެ ކަމުގަ އެވެ.
